Зеленский Трампни оғдирмоқчи, лекин Путин билан суҳбат барча режани ўзгартирдими?

Украина президенти Владимир Зеленский АҚШ президенти Доналд Трамп билан муносабатларда юмшоқроқ, дипломатик ёндашув орқали Вашингтонни ўз позициясига оғдиришга уринаётгани ҳақида The Wall Street Journal таҳлилий мақола эълон қилди. Аммо нашрнинг таъкидлашича, бу ҳаракатлар етарли бўлмаслиги мумкин.

Зеленский — Трампга очиқ, Путинга тайёр

Маълумотларга кўра, Зеленский Трамп таклиф этган вақтинчалик ўт очишни тўхтатиш режасини қўллаб-қувватлаган. Шу билан бирга, Украина ва АҚШ ўртасида минерал ресурслар борасида ҳам келишув имзоланган. Зеленский ҳатто Россия президенти Владимир Путин билан учрашиш ниятида Туркияга йўл олди — аммо Путин келишга рози бўлмади.

Трамп — Путинга яна юмшоқ?

Журналистлар таъкидлашича, бу саъй-ҳаракатларга қарамай, Трамп кеча Путин билан бўлиб ўтган телефон мулоқотидан сўнг яна Кремл таклиф этган сулҳ сценарийсини қўллаб-қувватлашга мойиллик билдирди. АҚШ етакчиси, аввалги кескин танқидларига қарамасдан, Москвага нисбатан позициясини юмшатгани кузатилди.

Санкциялар эмас, мулоқот аввало

WSJ ёзишича, Трамп илгарироқ Путиннинг сулҳни рад этишига жавобан Россияга қарши янги санкциялар жорий этиш билан таҳдид қилган. Аммо амалда бундай чора кўрилмади. Аксинча, Трамп яна Киев ва Москва ўзаро мулоқот қилиши лозимлигини таъкидлади.

Зеленский — «чидаш» ва умид

Аввалги тортишувларга қарамай, Зеленский Трамп билан яна бир учрашув ўтказган — бу сафар Ватиканда. Бу мулоқот ярашув руҳида ўтган, бироқ Америка президентининг Путинга нисбатан ижобий муносабати сақланиб қолмоқда.

Трамп эса охирги баёнотида Россия-Украина урушини тўхтатиш йўлида ҳаракат қилиш масаласида "қизил чизиқлар" ҳақида ўйлаётганини билдирди.

Путин: “Ҳал қилиниши зарур бўлган масалалар бор”

Кремл раҳбари Путин эса жамоатчилик олдида урушни тугатишга очиқ эканини билдирмоқда. Аммо, унинг таъкидлашича, жанговар ҳаракатлар тўхтатилиши учун аввал “бир қатор мураккаб масалалар” ечилмоғи лозим.

Zamin.uz таҳририятидан:
Сиёсий майдондаги дипломатик маневрлар ва шахсий мулоқотлар фонда тинчликка етишиш йўли янада мураккаблашмоқда. Зеленскийнинг юмшоқ сиёсати ва Трампнинг Путинга нисбатан ён босиши — бу ўйинда ким ғолиб чиқади, деб ўйлайсиз? Тинчлик учун ким биринчи қадам ташлаши керак? «Замин»ни Telegram’да ўқинг!