Рубио Путинни “ҳарбий жиноятчи” деб аташдан бош тортди — сабаби нима?

АҚШ давлат котиби Марко Рубио 21 май куни Конгрессдаги Ташқи ишлар бўйича қўмита эшитувларида жиддий саволларга юзма-юз келди. У Украинадаги уруш чоғида содир этилган айрим воқеаларни “ҳарбий жиноятлар” сифатида тан олди, аммо Россия президенти Владимир Путинни тўғридан-тўғри “ҳарбий жиноятчи” деб аташдан бош тортди.

“Россия босқинчи — бу аниқ”

Эшитув пайтида демократ конгрессмен Билл Китинг Рубиога биринчи саволни шундай берди: “Россия Украинага қарши босқинчи деб ҳисоблайсизми?” Рубионинг жавобида ҳеч иккиланиш бўлмади: “Ҳа, Россия Украинага бостириб кирди”.

Путин ҳақида савол – олти марта

Китинг сўнгра янада танқидийроқ нуқтага ўтди: “Владимир Путинни — биз музокаралар олиб бораётган инсонни — ҳарбий жиноятчи деб ҳисоблайсизми?” Рубио эса тўғридан тўғри жавоб бериш ўрнига, “ҳарбий жиноятлар албатта содир этилган”ини таъкидлади, аммо “ҳозирги асосий мақсад — урушни тўхтатиш”, деди.

Давлат котибининг таъкидлашича, музокараларсиз тинчликка эришиб бўлмайди: “Биз Путин билан гаплашмай туриб, бу урушни якунлай олмаймиз”. Китинг уни саволдан қочаётганликда айблади ва саволни жами олти марта такрорлади.

“Жавоб бериш вақти келади, лекин ҳозир эмас”

Рубио сўзларида давом этар экан, “ҳарбий жиноятлар содир бўлганини” қайта-қайта урғулади. “Буни ким содир этгани ва жавобгарлик масаласи келгусида белгиланади”, деди у. “Ҳозир эса ҳар куни одамлар ҳалок бўлаяпти, ҳарбий жиноятлар ортиб бораяпти. Биз бунга чек қўйиш учун фаол ҳаракат қилишимиз керак.”

Контекст ва Рубионинг аввалги позицияси

Қизиғи шундаки, Рубио 2017 йилда ўзи ҳам Путинни “ҳарбий жиноятчи” деб аташга чақирган эди. Ўша пайтдаги давлат котиби номзоди Рекс Тиллерсон Путин ҳақида аниқ баёнот беришдан бош тортганда, Рубио бундан норози бўлиб, “умумий қабул қилинган фикрни айтолмаганингиз мени хафа қилди”, деганди.

Zamin.uz таҳририятидан:
Рубионинг бу галги иккиёқлама баёноти дипломатик эҳтиёткорликми ёки геосиёсий инерция? АҚШ расмийлари бир томондан Россияни босқинчи деб атаётган бўлса, иккинчи томондан ҳали ҳам музокара эшикларини очиқ қолдирмоқда. Сиз буни қандай баҳолайсиз? Тинчлик учун сукут афзалми ёки аниқ позиция?