АҚШ F, M, J визаларини тўхтатди: талабалар хавотирда

АҚШ президенти маъмурияти хорижий талабалар учун янги визавий суҳбатлар ўтказилишини вақтинча тўхтатди, деб NOVA24 Politico нашрига таяниб хабар берди.
Давлат департаментининг ички телеграммасига кўра, АҚШнинг элчихоналари ва консулликларига F, M ва J туридаги визалар бўйича янги суҳбат слотларини очмаслик бўйича кўрсатма берилди.

Бу қарор визаларни кўриб чиқиш жараёнини чўзиши ва университетлар, айниқса хорижий талабалар ҳисобига молиялашадиган олийгоҳлар фаолиятига салбий таъсир кўрсатиши мумкин.

Мазкур қарор ижтимоий тармоқлар орқали талабгорларни текширишни кучайтириш режалари билан боғлиқ. Илгари бундай текширувлар фақат Ғазодаги вазият бўйича акцияларда иштирок этган талабаларга нисбатан қўлланилган эди, энди эса барча аризачилар қамраб олиниши мумкин.

Мутахассислар фикрича, бу ташаббус визаларни бериш жараёнини сезиларли секинлаштириши, кузги қабул жараёнига хавф солиши ва АҚШ университетларига жиддий молиявий зарба етказиши мумкин.

Шунингдек, текширув мезонлари ҳамон ноаниқ бўлиб қолмоқда — қайси пост ёки ҳаракат рад этишга сабаб бўлиши номаълум.