Киев марказида сирли отишма – УХХ полковниги ўлдирилди

Киев марказида сирли отишма – УХХ полковниги йўқ қилинди
Украинанинг юраги саналмиш Киевда содир бўлган охирги воқеа хавфсизлик соҳасидаги нозик мувозанатни яна силкитди. Бу гал суиқасд қурбони Украина Хавфсизлик Хизмати (УХХ)нинг энг ёпиқ ва махфий операцияларга масъул бўлинмасида хизмат қилган, полковник унвонини олган Иван Воронич бўлди, деб ёзди nytimes.com.

Ижтимоий тармоқларда тарқалган хабарларга кўра, Воронич Киевнинг Голосеевский туманида 10 июль куни эрталаб отиб кетилган. Унга пистолетдан бир неча марта ўқ узилган ва жиноятчи воқеа жойидан из қолдирмасдан қочиб кетган. Ҳозирда уни қидириш ишлари олиб борилмоқда. Фуқаролар орасида қон тўкилишга гувоҳ бўлганлар бор. Улар қўрқув ва ҳайрат орасида полицияга мурожаат қилганлар. Бу эса жамоатчиликда қўрқув ва жиддий хавотир уйғотди.

Қурбон ким эди ва нима билан шуғулланган?
Иван Воронич — оддий хавфсизлик ходими эмасди. У Хавфсизлик хизматида Россия ва вақтинчалик оккупация қилинган ҳудудлардаги операцияларни амалга оширадиган бешинчи бошқармада фаолият юритган. Қолаверса, маълум муддат ушбу бўлинмага раҳбарлик ҳам қилган. The New York Times манбаларига кўра, Воронич бир неча муҳим махсус операцияларда иштирок этган. Улар орасида Донбассдаги россияпараст қўмондонлардан бири — “Моторола” (Арсен Павлов) ни йўқ қилиш амалиёти алоҳида ажралиб туради.

Бу амалиётлар халқаро разветкалар, хусусан МРБ (Марказий разведка бошқармаси) кўмагида амалга оширилган бўлиши мумкинлиги ҳам тилга олинмоқда.

Эски “рус баҳори”га қарши уруш: фонида ким бор?
Украиналик хавфсизлик эксперти, собиқ УХХ ходими Иван Ступак NV нашрига берган интервьюсида Воронич ишлаган бўлинма фаолияти ҳақида очиқ-ойдин гапирди. Унинг таъкидлашича, “Гиви”, “Моторола”, ва унвони пастроқ бўлган “рус баҳори” фаолларининг кўпчилиги айнан шундай бўлинмаларнинг махфий амалиётлари натижасида йўқ қилинган. Қотиллик, ёниб кетиш, портлатиш — буларнинг барчаси фақат юзаки кўриниш. Асосий тузилиш эса кўринмас жанг майдонида бўлиб ўтган.

Қотилликнинг ҳуқуқий ва сиёсий томони
Вороничнинг ўлдирилиши бўйича Украина Жиноят кодексининг 348-моддаси — ҳуқуқни муҳофаза қилувчи орган ходимига тажовуз қилиш — асосида терговга қадар текширув бошланган. Бироқ экспертлар бу ишни фақат жиноятчи ва қурбон ўртасидаги шахсий можаро сифатида баҳоламаслик кераклигини таъкидламоқда. Бу ҳолатда сўз нафақат ички хавф ҳақида, балки ташқи кучлар ва уларнинг таъсири ҳақида бормоқда. Ҳозирда мамлакатда хавфсизлик тизими бутунлай қайта кўриб чиқилаётган бир пайтда, бундай суиқасдлар Украина учун нафақат юрак оғриғи, балки сиёсий сабоқ ҳам бўлмоқда.

Жамоатчиликда қарама-қарши фикрлар кўпаймоқда
Кўпчилик Воронични қаҳрамон деб билади. У жанг майдони эмас, лекин ундан ҳам хавфлироқ — махфий разведка фронтида фаолият юритган. Баъзилар эса бу суиқасдни ички “тозалаш” деб атаётир. Яъни, маълум кучлар ичидаги кекса кадрларни аста-секинлик билан йўқ қилиш орқали назоратни ўз қўлига олмоқда. Қандай бўлмасин, воқеа ортидан жамоатчиликда “ким навбатда?” деган савол кун тартибига чиқди. Чунки Украинада сўнгги вақтларда хавфсизлик хизматларига қаратилган суиқасдлар сони кескин ортмоқда.

Хулоса: бу “тасодиф” эмас
Иван Вороничнинг ўлими Украинадаги хавфсизлик тизимининг нечоғлик оғриқли нуқталарга эга эканини кўрсатиб турибди. Унинг қатли фақат шахсий кек эмас, балки геосиёсий ўйинлар, ички рақобат ва ташқи таъсирлар мажмуасининг оқибати бўлиши мумкин.

Ҳозирда Украина хавфсизлик хизматлари нафақат душманга, балки ўз ичидаги “кўринмас фронт”да ҳам кураш олиб бормоқда. Бу эса бутун мамлакат учун навбатдаги оғир синов бўлиши мумкин. «Замин»ни Telegram’да ўқинг!