Қозоғистоннинг Атирау шаҳрида ноодатий ва бир оз кинофильмларча воқеа юз берди — тергов изоляторида фамилиялар адашиши туфайли нотўғри маҳбус озод қилинди. Бу ҳақда мамлакат Ички ишлар вазирлиги Жазони ижро этиш тизими қўмитаси раиси ўринбосари Рустем Тунгышбаев маълум қилди.
Расмий маълумотларга кўра, озод этилган шахс умуман бошқа маҳбус бўлиб чиқди. Исм-фамилияларидаги ўхшашлик ходимларни чалкаштирган ва улар муддатидан олдин озод қилиш тўғрисидаги ҳужжатларни расмийлаштирган. Энг қизиғи шундаки, ҳужжатларга изоляторнинг бир нечта раҳбарлари ҳам имзо чекишган.
“Ақ Жайиқ” газетаси ёзганидек, ушбу хатолик фош этилгандан кейин қонун бузилиши бўйича жиноий иш қўзғатилган. Озод этилган шахс қисқа муддат ичида қайта қўлга олиниб, изоляторга қайтарилган.
Рустем Тунгышбаев таъкидлашича, бу воқеага йўл қўйган масъул шахслар албатта жавобгарликка тортилади. Унинг сўзларига кўра, ҳозирда хизмат текшируви олиб борилмоқда ва бу келгусида бундай хатолар такрорланмаслиги учун қўшимча назорат механизмлари жорий этилади.
Маҳаллий аҳоли ва ижтимоий тармоқ фойдаланувчилари бу воқеага турлича муносабат билдиришди — баъзилар буни “асримизнинг энг ҳайратланарли турма хатоси” деб атади, бошқалар эса бу каби эҳтиётсизлик жиддий оқибатларга олиб келиши мумкинлигини уқтирди.
«Замин»ни Telegram’да ўқинг!
