Ўзбекистон Ташқи ишлар вазирлиги, Мазори-Шарифда Алишер Навоий ҳайкали бузилгани ҳақидаги хабарлар ортидан Афғонистон расмийлари билан боғланди, деб Kursiv.uz хабар берди. Вазирлик бу воқеага оид расмий баёнот эълон қилди.
Маълумотларга кўра, ҳайкал жойлашган ҳудуд буюк мутафаккир хотирасига мос эмаслиги сабабли, маҳаллий ҳокимият уни демонтаж қилган. Бу ерда шоир ва мутафаккир учун янада чиройли мажмуа қуриш режалаштирилган.
Афғонистон Маданият вазирлиги билан ишлар келишилмаган. Кобул воқеадан афсусдалигини билдириб, Навоий шарафига янги ҳайкал ва у жойлашадиган майдон барпо этилишини маълум қилди.
Афғонистон томони буюк мутафаккир хотирасини сақлашга содиқлигини билдириб, унинг номини муносиб равишда қадрлаш учун барча чоралар кўрилишини таъкидлади.
Таъкидлаш жоиз, талиблар ҳокимиятга келганидан сўнг Навоийга оид бир неча объектлар шикастланган. 2023 йилда барельеф ва граффитига зарар етказилган, Ўзбекистон МИД эса бундан афсус изҳор этган эди.
«Замин»ни Telegram’да ўқинг!
