АҚШнинг Невада чўлидаги машҳур “Burning Man” фестивалида ноодатий воқеа содир бўлди — ёш оила ўзларининг трейлерида кутилмаган тарзда қиз фарзандли бўлди. Аёл ҳатто ҳомиладорлигини ҳам билмаган. Бу ҳақда Pravilamag хабар берди.
Кайла Томпсон исмли фестивал иштирокчиси журналистларга 27 август куни эри билан трейлерда тунаб қолганини айтган. Кутилмаганда қаттиқ оғриқ сезилган ва орадан кўп ўтмай у ҳаммомда 1,6 килограмм вазнли қизалоқни дунёга келтирган.
Кайланинг таъкидлашича, ҳомиладорлик давомида у ҳеч қандай “ҳомиладорлик белгилар”ни сезмаган ва ҳатто фарзанд кўриш ҳақида ўйлашмаган ҳам.
Туғруқдан сўнг эр ёрдам сўраб югуриб чиққан ва фестивал қатнашчилари орасидан ҳамшира-доя, педиатр ва гинекологни топишга муваффақ бўлган. Улар биринчи ёрдам кўрсатишганидан кейин она-бола дастлаб фестивалнинг тиббий марказига, сўнгра Ренодаги шифохонага олиб кетилган. Қизалоқ вертолётда, онаси эса машинада юборилган — эр-хотин бу қарорни “энг оғир лаҳзалардан бири” деб эслашди.
Кайланинг айтишича, шифохонадаги ҳамширалар ҳам унга “туғруқ қилган аёлга ўхшамайсан” деб ҳазиллашишган.
Фестивал ташкилотчилари эса Томпсонлар оиласини табриклаб, баёнот беришди:
“Шамол, жазирама ва қум бўронларига қарамай, улар Қора Рок Ситида янги ҳаётга йўл очишди. 'Burning Man'да нишонлайдиган энг муҳим қадриятларимиз — ҳаёт, алоқа, ўзгариш ва қувончдир”.
«Замин»ни Telegram’да ўқинг!
