Eurasianet тарқатган маълумотларга кўра, Доналд Трамп тарихда Марказий Осиёга ташриф буюрган биринчи АҚШ президенти бўлиши эҳтимолдан ҳоли эмас.
Нашр эслаб ўтганидек, президент Шавкат Мирзиёев Трампни Тошкентга таклиф қилиб келмоқда. Ўзбекистон томони бир неча бор расмий таклиф йўллаган, шунингдек, апрель ойида ташқи ишлар вазири Бахтиёр Саидов бошчилигидаги делегация Оқ уйга шахсан таклифномани топширган.
Маълумки, 2018 йилда Мирзиёев АҚШга ташриф буюриб, Оқ уйда Доналд Трамп билан учрашган эди. Ўша пайтда Америка раҳбари Мирзиёев ҳақида “жуда ҳурматли инсон” деб баҳо бергани тарихдан ўрин олган.
Жорий йилнинг 5 сентябрь куни бўлиб ўтган телефон суҳбатида ҳам Мирзиёев Трампга “қулай вақтда” Ўзбекистонга келиши учун таклифни такрорлагани айтилади.
Шунга қарамай, нашрнинг Вашингтондаги манбалари 9 сентябрь ҳолатига кўра, ҳали Марказий Осиёга сафар қилиш ҳақида аниқ қарор қабул қилинмаганини таъкидлади.
Eurasianet таҳлилчилари Трампнинг эҳтимолий ташрифи фақат Ўзбекистон билан чегараланмасдан, Қозоғистон йўналишини ҳам ўз ичига олиши мумкин, дея тахмин билдиришмоқда.
Шу тариқа, агар ташриф амалга ошса, бу тарихий воқеа бўлиб, Марказий Осиё ва АҚШ муносабатларида янги саҳифа очиши кутилмоқда.
«Замин»ни Telegram’да ўқинг!
