Илон Маскнинг Neuralink компанияси инсоният тарихида янги қадам ташлаб, 12 нафар шахс миясига нейрон имплантлар ўрнатилганини эълон қилди. Бу ҳақда компания Х ижтимоий тармоғида расмий баёнот берди.
Баёнотда қайд этилишича, “Ҳозирда бутун дунё бўйлаб Neuralink имплантлари билан яшаб келаётган 12 киши мавжуд. Уларнинг ҳаммаси биргаликда 2000 кун давомида қурилмалардан фойдаланишган ва бу даврда 15 000 соатдан ортиқ фаолиятни тўплашган. Биз барча иштирокчиларимиз билан нейрон интерфейсларнинг имкониятларини чуқур ўрганишда давом этишни интиқлик билан кутамиз!” — дейилади.
Биринчи чип инсон миясига 2024 йил январь ойида ўрнатилган эди. Шу орқали компания инновацион ютуқка эришди: миясига чип ўрнатилган биринчи бемор шахмат ўйнай олди. Бу эса нейротехнологиялар соҳасидаги илк қадам сифатида тарихий аҳамиятга эга бўлди.
Мутахассислар таъкидламоқдаки, Neuralink имплантлари инсон мияси ва компьютер интерфейслари ўртасидаги алоқани кучайтириш ва инсон фикрларини рақамли технологиялар орқали аниқлаш имконини яратади. Шундан келиб чиқиб, келгусида медицинанинг турли соҳаларида, шу жумладан ҳаяжонли ва мураккаб вазифаларни бажаришда ҳам қўлланилиши мумкин.
Илон Маск ва унинг командаси эълон қилишича, Neuralink синовлари ва илмий тадқиқотлар давомида иштирокчиларнинг хавфсизлиги ва мия функцияларини муҳофаза қилиш алоҳида диққат билан таъминланади. Шу билан бирга, компания келгусида имплантларни кенгроқ аудиторияга татбиқ қилиш ва инсон ҳаётида технологик инновацияларни ривожлантиришни мақсад қилган.
«Замин»ни Telegram’да ўқинг!
