Россияда ЛДПР партияси раҳбари Леонид Слуцкий мигрантларга ижтимоий пенсия тўлашни бекор қилиш таклифини билдирди. Бу ҳақда у “Газета.ru” порталига берган интервьюсида айтди, деб хабар беради Kursiv Media.
Слуцкийнинг таъкидлашича, Россия ҳозир мураккаб сиёсий ва иқтисодий босқичдан ўтмоқда — махсус ҳарбий операция, демографик муаммолар ва ижтимоий босим бу қарорга сабаб бўлмоқда. “Ҳар бир сўм ҳисобда, шунинг учун пенсиялар ўз фуқароларимиз учун бўлиши керак”, — деди у.
Унинг маълумотига кўра, ўтган йили Россияга келган мигрантлар сони 600 мингга кўпайган — бу сўнгги 30 йилдаги энг юқори кўрсаткич.
Агар таклиф қабул қилинса, бу пенсия тизимига тушадиган юкни енгиллаштириш ва бюджетни тежашга хизмат қилиши кутилмоқда. Эслатиб ўтамиз, ҳозирда Россия қонунчилигига кўра, хорижликлар 15 йил доимий яшаган бўлсалар ва пенсия ёшига етган бўлсалар, ижтимоий пенсия олиш ҳуқуқига эга.
“Zamin”ни Telegram'да ўқинг!
