АҚШ биринчи хоними Мелания Трамп сўнгги бир кун ичида етти нафар украиналик бола ва бир россиялик қиз оиласига қайтарилганини маълум қилди. Бу ҳақда у ўз видеомурожаатида гапирди. Видеолавҳа Оқ уйнинг расмий YouTube каналида чоп этилди.
Мелания Трампнинг таъкидлашича, Россия томони билан мулоқот канали август ойида Аляскада бўлиб ўтган АҚШ ва Россия президентлари учрашувидан кейин йўлга қўйилган. Ўшанда у Владимир Путинга шахсан мактуб йўллаб, уруш туфайли ажралиб қолган болалар тақдири ҳақида ёзган эди. Мактубда Мелания урушни тўхтатиш — бу нафақат Украина, балки Россия болалари фаровонлиги учун ҳам муҳим эканини таъкидлаган.
«У менга ёзма равишда жавоб берди ва тўғридан тўғри мулоқот қилишга тайёрлигини билдирди. Шу орқали биз Россиядаги украиналик болалар ҳақида маълумот алмашишни бошладик», — деди АҚШ биринчи хоними. Унинг сўзларига кўра, шу вақт ичида икки давлат ўртасида “очиқ мулоқот йўли” яратилган.
Охирги уч ойда Меланиянинг жамоаси Россия вакиллари билан бир неча марта учрашиб, болаларни қайта бирлаштириш масаласини муҳокама қилган. Россия томони бу жараёнда иштирок этган болаларнинг маълумотлари, суратлари, шунингдек, уларга кўрсатилаётган ижтимоий, тиббий ва психологик ёрдамлар рўйхатини тақдим этган.
Трампнинг айтишича, Россия бу жараёнда очиқлик намоён этган ва тақдим этилган маълумотлар АҚШ ҳукуматининг тегишли идоралари томонидан тасдиқланган. Шунингдек, Украина парламентининг Инсон ҳуқуқлари бўйича вакили ва президентнинг болалар масалалари бўйича вакили ҳам текширувда иштирок этган.
Мелания Трампнинг маълум қилишича, Россия 18 ёшга тўлмаган, аммо ҳали ҳам Россия ҳудудида бўлган украиналик ўсмирларни ватанига қайтаришга розилик билдирган.
«Биз яқин ҳафталарда болаларнинг яна бир гуруҳини оилалари билан бирлаштиришни режалаштирмоқдамиз. Тинчлик имкони борича тезроқ келишига ишонаман», — деди АҚШнинг биринчи хоними.
Бу баёнот жаҳон оммавий ахборот воситаларида катта қизиқиш уйғотди — таҳлилчилар Мелания Трамп ва Путин мулоқоти халқаро инқироз фонида янги дипломатик саҳифа очиши мумкинлигини таъкидламоқда.
“Zamin”ни Telegram'да ўқинг!
