Франция президенти Эммануэль Макрон Себастьян Лекорнюни яна бош вазир лавозимига тайинлади, деб Bloomberg нашри хабар берди.
Нашрнинг таъкидлашича, ушбу қарор сиёсий барқарорликни сақлаш ва навбатдаги ҳукумат инқирозининг олдини олишга қаратилган охирги саъй-ҳаракат сифатида баҳоланмоқда.
Лекорню 9 сентябрдан 6 октябргача Франция ҳукуматига раҳбарлик қилган. У истеъфосидан бир кун аввал янги ҳукумат таркибини эълон қилган, аммо уни мухолифат кескин танқид қилган.
13 октябрь, душанба куни, Лекорню янги давлат бюджети лойиҳасини парламентга тақдим этади. Агар бу ҳужжат қабул қилинмаса, ҳукуматни молиялаш учун алоҳида қонун қабул қилиниши лозим бўлади.
Себастьян Лекорню 1986 йил 11 июнда Обонн шаҳрида туғилган. У 2022 йил баҳоридан 2024 йил майигача Франция мудофаа вазири бўлган, ундан аввал 2020–2022 йилларда орол ва чекка ҳудудлар вазирлигини бошқарган.
“Zamin”ни Telegram'да ўқинг!
