Саудия Арабистони Ҳаж ва Умра вазирлиги 2026 йилги Ҳаж мавсумида янги талаб ва қоидаларни амалга киритди, деб маълум қилди Ўзбекистон мусулмонлари идораси Ҳаж ва Умра маркази.
Маълумотга кўра, энди ҳар бир зиёратчига Ҳаж визаси фақат «Nusuk» платформаси орқали олинган соғломлик ҳақидаги расмий тиббий гувоҳнома тақдим этилганидан кейингина берилади.
Бу янгилик Саудия Соғлиқни сақлаш вазирлиги ташаббуси билан жорий этилган бўлиб, унинг мақсади — зиёратчиларнинг хавфсизлиги ва соғлиги учун қўшимча кафолат яратишдир. Энди Ҳаж ва Умра сафарига масъул вазирлик ҳамда ташкилотлар ҳар бир номзодни махсус тиббий кўрикдан ўтказиши ва унинг сафарга лаёқатини аниқлаши шарт бўлади.
Расмий маълумотда айтилишича, бу талаблар нафақат касаллик тарқалишининг олдини олиш, балки зиёрат пайтида инсон ҳаётига хавф туғдириши мумкин бўлган ҳолатларни бартараф этишга қаратилган. Саудия ҳукумати бу орқали Ҳаж зиёратини ташкил этишда янада тартиб-интизом ва масъулиятни кучайтиришни мақсад қилган.
Ҳужжатда таъкидланишича, тиббий кўрикдан ўтмаган ёки гувоҳнома тақдим этмаган фуқароларга визани расмийлаштириш имкони берилмайди. Бу эса аввалги йилларга нисбатан катта ўзгариш ҳисобланади, чунки аввал тиббий маълумотлар кўпинча тавсия даражасида бўларди.
Маълум қилинишича, айрим оғир касалликларга чалинган шахсларга Ҳаж сафарига рухсат берилмайди. Улар қаторида буйрак етишмовчилиги туфайли диализга муҳтож беморлар, енгил ҳаракатда ҳам нафас қисилиши билан кечувчи юрак етишмовчилиги, ўпка фаолиятини сустлатувчи сурункали хасталиклар бор. Шунингдек, жигар циррози, оғир руҳий ёки неврологик бузилишлар, қарилик деменцияси ва ҳомиладорликнинг сўнгги босқичидаги аёллар ҳам сафарга чиқиши мумкин эмас.
Бундан ташқари, юқумли касалликларнинг фаол шаклларига эга бўлган шахслар, жумладан сил ёки геморрагик иситма каби касалликларга чалинганлар, ҳамда кимётерапия ёки иммунитетни сусайтирувчи даволаниш жараёнида бўлган онкологик беморлар ҳам Ҳаж сафаридан четда қолади.
Саудия Ҳаж ва Умра вазирлиги таъкидлашича, агар ушбу талабларга риоя этилмаса ёки ҳужжатларда ёлғон маълумот берилса, тегишли чоралар кўрилади. Бу нафақат зиёратчиларнинг шахсий масъулиятини ошириш, балки умумий тартиб ва хавфсизликни таъминлаш мақсадида амалга оширилмоқда.
Мутахассислар фикрича, янги тизим нафақат зиёратчилар соғлигини муҳофаза қилишга, балки Ҳаж ва Умра сафарлари давомида юқумли касалликлар тарқалишининг олдини олишга хизмат қилади. Шу тариқа, 2026 йилги Ҳаж мавсуми янада тартибли ва хавфсиз шароитда ўтиши кутилмоқда.
“Zamin”ни Telegram'да ўқинг!
