Вьетнамда охирги кунларда ёғган кучли ёмғирлар ва кўчкилар ортидан вазият кескинлашди, деб хабар берди The Independent.
Расмий маълумотларга кўра, кучли тошқинлар натижасида камида 37 киши ҳалок бўлган. Ҳокимият ҳафтанинг охирида яна бир кучли тайфуннинг яқинлашаётганини маълум қилди.
Октябрь охиридан бери ёғган рекорд даражадаги ёмғирлар кўплаб ҳудудларни вайрон қилган. Қишлоқлар сув остида қолган, уйлар қулаб тушган, ўн минглаб одамлар бошпанасиз қолган. Дананг шаҳри ва қатор вилоятлар электр ҳамда алоқа тармоқларидан узилган.
Вьетнам Миллий гидрометеорологик маркази маълум қилишича, 5 ноябрга келиб шамол тезлиги соатига 166 километргача етиши мумкин. Янги бўрон Филиппин оролларидан ўтиб, Жанубий Хитой денгизига киргач кучайиши тахмин қилинмоқда.
VN Express ёзишича, UNESCO жаҳон мероси рўйхатидаги қадимий Хойан шаҳри ҳам сув остида қолган. Аҳоли шаҳар кўчаларида қайиқларда ҳаракатланмоқда.
“Bangkok Post” маълумотларига кўра, фақат жорий йилнинг ўзида Вьетнам 12 та йирик бўронни бошидан кечирган, 240 дан ортиқ киши ҳалок бўлган. Иқтисодиётга етган зарар 53,8 триллион донгдан ошган.
Муттахассислар мамлакатнинг узун қирғоқ чизиғи ва иқлим ўзгариши Вьетнамни циклонлар учун янада ҳимоясиз ҳолга келтираётганини таъкидламоқда.
“Zamin”ни Telegram'да ўқинг!
