“Miss Universe”да жанжал: вице-президент иштирокчини ҳақорат қилди (видео)
“Мисс Универсе 2025” танловининг 5 ноябр куни Бангкокда ўтган кутиб олиш маросимида ташкилот вице-президенти Нават Ицарагрисил Мексика вакили Мелиссе Флорес Бошни жонли эфир вақтида “аҳмоқ” деб ҳақорат қилди. Низо Мелиссенинг ҳомийлик фотосессиясида иштирок этмагани сабаб юзага келган ва у зални тарк этганидан сўнг бир неча иштирокчи, жумладан, ўтган йилги ғолиба Виктория Кер Тейлвиг ҳам тадбирни тарк этган.
Таиландда ўтказилаётган “Miss Universe 2025” танлови жанжал билан бошланди, деб хабар берди International Business Times.
5 ноябрь куни Бангкокда бўлиб ўтган кутиб олиш маросимида ташкилот вице-президенти Нават Ицарагрисил Мексика вакили Мелиссе Флорес Бошни омма олдида ҳақорат қилиб, “аҳмоқ” деб атаган. Бу воқеа жонли эфир пайтида содир бўлган.
Маълумотларга кўра, низо Мелиссе ҳомийлик фотосессиясида иштирок этмагани учун келиб чиққан. Нават уни камералар олдида жавоб беришга мажбур қилмоқчи бўлган, аммо қиз буни рад этгач, у гапини бўлиб ҳақоратли сўз ишлатган ва муҳофазачиларга уни чиқариб юборишни буюрган.
Мелиссе зални тарк этганидан кейин бир неча иштирокчи, жумладан, ўтган йилги ғолиба Виктория Кьер Тейлвиг ҳам тадбирни тарк этган.
Мексика вакили кейинроқ чиқишида шундай деган:
“Мен XXI асрда яшаяпман ва сўз эркинлигидан қўрқмайман. Бу танлов аёллар овозини эшитиш учун жой бўлиши керак, қўғирчоқлар саҳнаси эмас”.
Жанжалдан сўнг ижтимоий тармоқларда “Miss Universe” ташкилотини танқид қилувчи постлар кўпайди. Кўплаб фойдаланувчилар аёллар қадрини топтаган бундай вазият танловнинг обрўсига жиддий зарба берганини таъкидламоқда.
Изоҳлар 0
…