Нигериянинг Кебби штатидаги мактаб-интернатга қуролланган жиноятчилар ҳужум қилиб, бир ўқитувчини ўлдирди ва 25 нафар ўқувчи қизни ўғирлаб кетди. BBC ёзишича, воқеа 17 ноябрь куни тонгги соат тўртларда Мага қишлоғида содир бўлган.
Маълумотларга кўра, ҳужумчилар мотоциклларда мактаб ҳудудига бостириб кириб, аввал ўқитувчини, сўнгра қўриқчини отиб ўлдирган. Кейин қизлар жойлашган ётоқхонага кириб, 25 нафар ўқувчини куч билан олиб чиққан.
Штат полицияси вакили Нафию Абубакар Котаркосининг айтишича, жиноятчилар замонавий қуроллар билан қуролланган бўлган ва қўриқчилар билан тўқнашув ҳам содир бўлган. Ҳозирда махсус бўлинмалар томонидан қидирув ишлари олиб борилмоқда, аммо ҳужумга оид муҳим далиллар ҳали топилмаган.
Маълум ки, Нигериянинг шимолий ва шимоли-ғарбий ҳудудларида қуролли гуруҳлар одам ўғирлаш ва гаровга олиш билан шуғулланади. Бундай тўдалар қишлоқ ва мактабларга бостириб кириб, талончилик, гаровга олиш ва пул талаб қилиш каби жиноятларни мунтазам амалга оширади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
