Шимолий Европа давлатларида кучли қишки бўрон кузатилди. Швецияда бўрон оқибатида икки киши ҳалок бўлди. “Ёҳаннес” деб номланган бўрон кучли шамол, қор ёғиши ва совуқ билан кечиб, аҳолининг кундалик ҳаётига жиддий таъсир кўрсатди.
Швеция расмийларининг маълумотига кўра, бир киши дарахт қулаб тушиши натижасида вафот этган. Яна бир киши эса хизмат вақтида содир бўлган бахтсиз ҳодиса туфайли ҳалок бўлган. Мамлакатнинг шимолий ҳудудларида кучли шамол сабабли огоҳлантиришлар эълон қилинди.
Бўрон сабаб Швеция, Норвегия ва Финляндияда ўн минглаб хонадонлар электр таъминотисиз қолди. Кўплаб поездлар, самолётлар ва паром қатновлари бекор қилинди. Йўлларда ҳаракат қийинлашди, фавқулодда хизматлар кучайтирилган тартибда ишлади.
Финляндияда кучли шамол сабаб аэропортда самолётлар учиш-қўниш йўлагидан чиқиб кетди, бироқ жабрланганлар йўқ. Расмийлар аҳолига эҳтиёт чораларини кўришни ва об-ҳаво яхшиланмагунча узоқ сафарлардан тийилишни тавсия қилди. Бўрон оқибатларини бартараф этиш ишлари давом этмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
