АҚШ президенти Дональд Трампнинг 18 ёшли набираси Кай Трамп шахсий ҳаётидаги энг катта “қийинчилик”лардан бири ҳақида очиқ гапирди — унинг орқасидан доим Махфий хизмат ходимлари юриши.
Кай бу ҳақда 76 миллион обуначига эга инфлуенсер Логан Полнинг Impaulsive подкастида сўзлаб берди. Унинг айтишича, махфий хизмат ҳаётига кириб келганидан кейин ҳамма нарса кескин ўзгарган: оддий вазиятлар ҳам ғалати кўриниш ола бошлаган.
“Бу жуда оғир. Дўстларинг билан, бир гуруҳ қизлар билан ўтирсанг, тахминан бир метр орқангда улкан бир эркак турса — кайфият автоматик равишда ўзгаради”, дейди у.
Кайнинг таъкидлашича, учрашув пайтида ҳам бу ҳолат айниқса ноқулай: агентлар “кайфиятни бузувчи омил”га айланиб қолади. “Очиғини айтсам, бир йигит билан учрашувда бўлиб, у сендан икки стол нарида ўтирса — бу ҳақиқатан ҳам ғалати”, дейди у.
Кай 2024 йили бобоси президентликка сайлангандан кейин “диққатни жамлаб, қўриқчиларни гўё йўқдек қабул қилиш”га мажбур бўлганини айтди. Яъни, оддий ёшлик — расман бор, амалда эса доим кузатувда.
Қизиғи, Кайнинг бу муаммоси фақат унгагина тегишли эмас. Унинг амакиси Баррон Трамп ҳам учрашувларда худди шундай қийинчиликларни бошдан кечираётгани айтилади. Page Six таблоидига кўра, Баррон учрашувга чиқиши учун Trump Tower биносининг бутун бир қавати текшириб чиқилган.
Кай эса ҳозирча оила қуриш ҳақида ўйламаётганини очиқ айтган. Унинг гапига кўра, онаси Ванесса Трамп доим бир нарсани уқтиради: аввал карера, кейин қолгани. Кай ҳам шу йўлни танлаб, аввало голфда ўзини кўрсатиш, турнирларда ғалаба қозонишни мақсад қилган.
Қисқаси, “президент набираси” деган мақом ташқи томондан чиройли туюлиши мумкин, лекин ичкаридан қараганда бу — оддий ҳаётга доимий чеклов. Ёшлик кайфи эса… қўриқчилар билан бирга “пропуск” орқали киради.
“Zamin”ни Telegram'да ўқинг!
