Белгияда Токио университети олимлари томонидан Нипах вирусига қарши яратилган вакцинанинг илк клиник синовлари бошланиши кутилмоқда. Хабарга кўра, бу босқичда синовлар одамлар иштирокида ўтказилади, дея маълум қилди Nikkei.
Маълум қилинишича, вакцинанинг приматларда ўтказилган тажрибаларида 100 фоизлик натижа қайд этилган. Энди эса энг муҳим қадам — инсон организмида хавфсизлик ва самарадорликни текшириш.
Олимлар келгусида тадқиқот географиясини кенгайтиришни ҳам режалаштирмоқда: кейинги босқичда Бангладешда катталар ва болалар иштирокида қўшимча синовлар ўтказилиши мумкин.
Эслатиб ўтиш жоиз, аввалроқ Ҳиндистоннинг Калкутта шаҳри яқинида Нипах вируси тарқалаётгани ҳақида хабарлар пайдо бўлганди. Ушбу вирус ҳайвонлардан юқиши, зарарланган озиқ-овқат орқали тарқалиши ёки инсондан инсонга юқиши ҳам мумкинлиги таъкидланади.
Жаҳон соғлиқни сақлаш ташкилоти маълумотларига кўра, Нипах вируси юқтирилганда ўлим даражаси 40 фоиздан 75 фоизгача етиши мумкин — бу эса эпидназорат сифати ва маҳаллий тиббиёт тизими имкониятларига боғлиқ.
Қисқаси, вазият ҳали “ҳаммаси ҳал бўлди” дегани эмас, лекин клиник синовлар бошланиши — жуда катта қадам. Агар натижалар ижобий чиқса, Нипахга қарши курашда кучли “қалқон” пайдо бўлиши мумкин.
“Zamin”ни Telegram'да ўқинг!
