Европарламентнинг мудофаа ва хавфсизлик қўмитаси 9 февраль, душанба куни Украинага ҳарбий кўмакни шошилинч тарзда кенгайтириш зарурлигини билдирди. Қўмита вакиллари 5–6 февраль кунлари Киевга бориб, турли музокаралар кетаяпти деган гапларга қарамай, майдонда ўт очишни тўхтатиш аломатлари сезилмаганини таъкидлади.
Қўмита раиси Мари-Агнес Штрак-Циммерманнинг айтишича, делегация Киевда бўлган вақтда Россия томонидан фуқаролик инфратузилмасига ракетали зарбалар берилгани, тинч аҳоли орасида қурбонлар бўлаётгани ҳамда минглаб инсонлар совуқда иситиш ва электрсиз қолиб, музлаб қолиш хавфига дуч келаётганига гувоҳ бўлган. Унинг фикри аниқ: “Тинчлик музокараларидаги илгарилашни қўллаб-қувватласак-да, шунчаки тинчликка умид қилиб туролмаймиз — ҳозир ҳаракат қилишимиз ва Украинага куч орқали тинчликка эришиш имконини беришимиз керак”.
Евродепутатларнинг Киевга ташрифи, айни пайтда, Европарламентнинг Страсбургдаги мажлиси олдидан амалга оширилган. 11 февраль, чоршанба куни мажлисда Европа Иттифоқи томонидан Украинага 90 миллиард евро миқдорида кредит ажратиш масаласи бўйича овоз бериш режалаштирилгани қайд этилган.
Ташриф доирасида делегация Украина президенти офиси ҳамда ҳукумат вакиллари, Олий рада раҳбарияти, шунингдек, фуқаролик жамияти ва мудофаа саноати билан боғлиқ тузилмалар вакиллари билан учрашган. Европарламент матбуот релизида ҳам “ЕИ фуқаролари Украинани қўллаб-қувватлаш ва Европа мудофаасини мустаҳкамлашга чақирмоқда”, деган мазмунда фикр келтирилган.
Матбуот релизида, шунингдек, Украина Европа Иттифоқининг мудофаа ташаббусларида иштирок этишга қизиқиш билдиргани урғуланади. Хусусан, Европа мудофаа саноати дастури (EDIP) ва “Европа учун хавфсизлик” (SAFE) инструменти каби йўналишлар тилга олинган. Депутатлар эса Европа мудофаа салоҳиятини ошириш, Украина мудофаа саноатини ЕИ мудофаа тизимига яқинлаштириш ва интеграция қилиш учун қонунчилик ҳамда бюджет имкониятларидан фойдаланишга тайёр эканини билдирган.
Қисқаси, қўмита позицияси шундай: вазият “кўрамиз-чи” деган режимда эмас, “ҳозир ҳаракат қиламиз” деган босқичда турибди. Музокаралар бор — лекин фронтда ва шаҳарларда воқелик ҳам бор. Шу сабаб Украинага ёрдамни кучайтириш масаласи Европа кун тартибида янада олдинги қаторга чиқмоқда.
“Zamin”ни Telegram'да ўқинг!
