АҚШ маъмурияти Эроннинг ядровий салоҳиятини бутунлай йўқ қилиш мақсадида янги ҳарбий режаларни кўриб чиқмоқда. Ҳарбий экспертлар ва собиқ ҳукумат вакилларининг таъкидлашича, Вашингтон ва унинг иттифоқчиси Исроил Эрон ҳудудидаги ядровий иншоотларни эгаллаш ҳамда уларни вайрон қилиш учун махсус операциялар ўтказиш вариантини жиддий ўрганмоқда. Бу ҳақда semafor.com хабар беради.
АҚШ армиясининг "Делта Форcе" каби элита бўлинмалари ядровий материаллар ва центрифугаларни олиб чиқиб кетиш ёки йўқ қилиш бўйича махсус топшириқларга тайёрланган. Мутахассисларнинг қайд этишича, бу каби операциялар кенг жамоатчиликка ошкор қилинмаса-да, ҳарбий режаларда мавжуд бўлган муҳим вариантлардан бири ҳисобланади. Ҳозирги кунда Исфаҳон шаҳридаги ер ости туннелларида жойлашган ядровий объектлар асосий нишонлардан бири бўлиб қолмоқда.
Эрон томони ҳам хавфсизлик чораларини кучайтириб, Исфаҳондаги туннель кириш жойларини тупроқ билан кўмиб, мудофаа тизимини мустаҳкамлашга уринмоқда. АҚШ Марказий қўмондонлиги эса ушбу ҳудудларни вақтинча эгаллаш ва у ердаги бойитилган уран захираларини йўқ қилиш бўйича логистик муаммоларни таҳлил қилмоқда. Аввалги йилларда бу каби режалар жуда хавфли деб ҳисобланган бўлса-да, ҳозирги вазиятда Вашингтон учун ядровий қурол яратилишининг олдини олиш устувор вазифага айланган.
Ҳозирча АҚШ ва Исроил ўз ҳаракатларини асосан Эрон ҳарбий-денгиз кучлари ҳамда баллистик ракета саноатига қарши қаратган эди. Бироқ, ядровий иншоотларга қуруқликдаги ҳужум эҳтимоли тобора ортиб бормоқда. Агар ҳаво ҳужумлари кутилган натижани бермаса, махсус кучларнинг бевосита иштирокидаги операциялар амалга оширилиши мумкин.
“Zamin”ни Telegram'да ўқинг!
