АҚШ Президенти Доналд Трамп Украина можароси бўйича музокараларни давом эттириш мақсадида Москвага америкалик вакилларни юборишга тайёр эканини маълум қилди.
Журналистлар билан мулоқот чоғида Трампдан Россияга музокарачилар юбориш эҳтимоли ҳақида сўралганда, у: “Агар бу натижа беришига ишонсам, албатта буни қиламан”, дея жавоб берган. У, шунингдек, Россия ва Украина ўртасидаги урушни тезроқ якунлаш тарафдори эканини таъкидлаган.
Сулҳ ва асирлар алмашинуви ташаббуси
Мазкур баёнот Россия томонининг айрим ташаббусларни қўллаб-қувватлагани фонида янгради. Хусусан, Россия Президенти ёрдамчиси Юрий Ушаков 9–11 май кунлари ўт очишни тўхтатиш ҳамда “1000 га 1000” форматида ҳарбий асирлар алмашинувини амалга ошириш ғоясига ижобий муносабат билдирилганини тасдиқлаган.
Аввалроқ Трамп ҳар икки томонга мурожаат қилиб, айнан шу саналарда вақтинчалик сулҳ эълон қилиш ва асирлар алмашинувини йўлга қўйишни таклиф этган эди. У бу муддатни Россияда нишонланадиган Ғалаба куни билан боғлаган.
Москва музокараларга очиқ
Россия Ташқи ишлар вазирлиги расмий вакили Мария Захарова ҳам Москва Украина бўйича музокаралардан воз кечмаётганини, амалий натижа берадиган ҳар қандай ташаббусга тайёр эканини билдирган.
Унинг сўзларига кўра, ҳозирда ушбу жараёнда иштирок этаётган АҚШ вакиллари бошқа минтақавий масалалар, жумладан Яқин Шарқдаги вазият билан ҳам шуғулланмоқда.
“Zamin”ни Telegram'да ўқинг!
