Алмазбек Атамбоев устидан суд жараёни ёпиқ тартибда ўтади

Қирғизистонда жиноий авторитет Азиз Батукаевнинг ноқонуний озод этилиши бўйича суд жараёни жамоатчилик ва ОАВ учун ёпиқ тартибда ўтади. Бундай қарорни суд иши бўйича дастлабки тингловда Бишкекнинг Первомайск тумани суди қабул қилган.

Батукаев иши бўйича айбланувчилардан бири Қирғизистоннинг собиқ президенти Алмазбек Атамбоев ҳисобланади. Ундан ташқари, ушбу иш бўйича яна 18 киши судланувчи сифатида ўтиб, улардан 14 нафари тергов билан битимга борган.

Таъкидланишича, Батукаевнинг озод этилиши ишида махфийлаштирилган томлар мавжуд бўлиб, Атамбоевнинг ҳимояси улардан бирини ошкор қилишни сўраган. Бироқ суд бу илтимосни рад этган.

Жиноий иш бўйича биринчи суд мажлиси 15 ноябрга белгиланган.

Ҳозирда тергов изоляторида ҳибсда ушлаб турилган Атамбоев суд жараёнини “ўйин” деб атаб, норозилик сифатида ўз камерасини тарк этишдан бош тортмоқда. Дастлабки тинглов унинг иштирокисиз ўтган.

2013 йилда Азиз Батукаев қотиллик учун жазони ўтаётган турмадан оғир хасталикка учрагани важи остида озод этилган. Чечен миллатига мансуб жиноий авторитет озодликка чиққан куниёқ хусусий самолётда Чеченистонга учиб кетган ва ҳанузгача ўша ерда қолмоқда.

Терговнинг фикрича, Батукаевнинг озод этилишига ёлғон ташхис қўйган шифокорлар, қарорни қабул қилган судья, прокурорлар ва гўёки президентлиги вақтида Батукаевнинг озод этилиши операциясига шахсан рухсат берган Атамбоев алоқадор бўлиши мумкин. “Замин” янгиликларини “Youtube”да кузатиб боринг