07:00 / 25.06.2020
2 106

ОАВ: Туркманистонда Ашхободдаги касалхона ходимларида коронавирус аниқланди

ОАВ: Туркманистонда Ашхободдаги касалхона ходимларида коронавирус аниқланди
Фото: «Хроника Туркменистана»
Туркманистондаги С.Ниёзов номидаги даволаш-консултатив марказининг олти нафар ходимида, хусусан, шифокорларда COVID-19 коронавирус инфекцияси борлиги аниқланди. Бу ҳақда «Хроника Туркменистана» нашри хабар тарқатган.

Инфекцияга чалинганларнинг уч нафарининг ҳолати ўртача оғирликда экани айтилмоқда.
Марказда юқумли касалликлар бўлими мавжуд эмас, шунинг учун беморларнинг бир қисми Чўганлидаги касалхонага, қолганлар эса Ахал вилоятида тайёрлаб қўйилган изоляторларга жойлаштирилган.

С.Ниёзов номидаги даволаш-консултатив маркази — Туркманистоннинг энг катта тиббиёт муассасаларидан бири ҳисобланади. Унда мамлакат бўйича бир йил давомида ўн минглаб одамлар тиббий кўрикдан ўтиб, даволанади. Беморларнинг ҳаммаси марказий қабул бўлимида рўйхатга олинади.

Муассаса шифокорларнинг малакали экани, хизматлар бошқа замонавий касалхоналардагидан анча арзонлиги туфайли халқ орасида оммавийлашган.

«Хроника Туркменистана» нашрининг ёзишича, Гурбангули Бердимуҳамедов президентлиги даврида қурилган янги касалхоналарга тиббиёт ходимларини олишда, асосан, ташқи кўриниш ва номзодларнинг 35 ёшдан катта эмаслигига эътибор қаратилган.

Май ойида Туркманистон касалхоналарига коронавирусга чалинганлар келаётгани айтилган, бироқ мамлакат ҳукумати касалликнинг расман қайд этилганини тан олмаганди.

Манба: Daryo.uz
Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)