Узоқ вақт бир жойда қимирламай ўтириш инсон саломатлиги учун жуда хавфли экани яна бир бор исботланди. “JAMA Network Open” журналида чоп этилган янги тадқиқотга кўра, иш вақтида узоқ ўтириш барча турдаги ўлим хавфини, айниқса юрак-қон томир касалликлари билан боғлиқ ҳолатларни сезиларли оширади, деб хабар берди zamin.uz.
Тайбэй Тиббиёт университети олимлари 481 мингдан ортиқ катталар қатнашган йирик кузатув ўтказди. Иштирокчилар қарийб 12 йил давомида текширилган: улар соғлиқ тарихи, кундалик одатлари ва олиб борган фаолияти ҳақида маълумот бериб борган.
Натижалар шундан далолат бердики, тадқиқотдаги одамларнинг 60 фоизи иш вақтининг асосий қисмини ўтириб ўтказган, 29 фоизи ўтириш ва туришни алмаштириб ишлаган, 10 фоизи эса деярли ўтирмаган.
12 йил ичида 26 мингдан ортиқ киши вафот этган ва уларнинг ярмидан кўпи кўпроқ ўтирган гуруҳга тўғри келган. Бундан ташқари, узоқ ўтирувчиларда барча сабаблар бўйича ўлим хавфи 16 фоиз, юрак-қон томир касалликлари бўйича эса 34 фоизга юқори экани аниқланган.
Мутахассислар айниқса ёши 60 дан ошганлар, чекиш одати борлар ва сурункали касалликлардан қийналганлар учун хавф янада ошишига эътибор қаратган.
Олимлар хулоса қилишига кўра, иш жараёнида ўтириш ва ҳаракатни мос равишда алмаштириш, қисқа танаффуслар қилиш ва кун давомида фаолликни кўпайтириш орқали ушбу жиддий хавфни камайтириш мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
