Бугунги кунда зираворлар ва чили қалампири нафақат таомларга ўзига хос мазза бағишловчи қўшимча, балки организм учун фойдали табиий восита сифатида ҳам эътироф этилмоқда. Мутахассислар таъкидлашича, аччиқ таомлар таркибида мавжуд фаол моддалар инсон саломатлигига ижобий таъсир кўрсатади.
Хусусан, чили қалампирида учрайдиган капсаитсин моддаси юрак-қон томир касалликларининг олдини олишда, қон айланишини яхшилашда ҳамда айрим нафас йўллари билан боғлиқ муаммолар хавфини камайтиришда муҳим аҳамиятга эга. Шу билан бирга, у бактерияларга қарши курашиш хусусиятига эга бўлиб, организмдаги яллиғланиш жараёнларини пасайтиришга ёрдам беради.
Аччиқ таомлар истеъмол қилинганда организмда эндорфин — яъни “бахт гормони” ишлаб чиқарилиши фаоллашади. Бу эса инсоннинг кайфиятини кўтариш, руҳий ҳолатни яхшилаш ва кун давомидаги чарчоқни камайтиришга хизмат қилади.
Шу билан бирга, мутахассислар аччиқ овқатларни меъёрдан ортиқ истеъмол қилмасликни тавсия этади. Айниқса, гастрит, ошқозон яраси ва ҳазм тизими билан боғлиқ муаммолари бор инсонлар учун бундай таомлар эҳтиёткорлик билан, оз миқдорда истеъмол қилиниши лозим.
Умуман олганда, аччиқ таомларни меъёрида ва мунтазам равишда тановул қилиш соғлиқни мустаҳкамлаш ҳамда умумий ҳолатни яхшилашнинг энг тўғри ва самарали усулларидан бири ҳисобланади.
“Zamin”ни Telegram'да ўқинг!
