Футбол оламидаги энг катта юлдузлардан бири, “Интер Майами” ҳужумчиси Лионель Месси бу сафар гол, дриблинг ёки кубоклар ҳақида эмас, ҳаёт ҳақида гапирди. Ундан ҳаммага бирдек берса бўладиган умумий маслаҳат ҳақида сўралганда, аргентиналик афсона жуда содда, лекин чуқур маъноли жавоб қайтарди.
Мессининг айтишича, ҳар бир инсоннинг ҳаёти, шароити ва бошдан кечираётган синовлари турлича. Шу боис у “ҳаммага мос келадиган тайёр рецепт”ни айтишни осон деб билмайди. Чунки кимдир енгилроқ йўлдан ўтади, кимдир эса жуда оғир шароитда курашади.
— Ҳамма ҳам бир хил шароитда яшамайди, кўпчилик турли қийинчиликларга дуч келади. Менинг йўлим омадли кечди, шунинг учун маслаҳат беришим қийин. Айта оладиган ягона нарса — ҳар доим ҳаётдан завқланиш керак, — деди саккиз карра “Олтин тўп” соҳиби.
Бу гаплар оддий эшитилиши мумкин, аммо Месси каби футбол тарихидаги энг босимли ва энг ёруғ карьера эгаларидан бири оғзидан чиққанида, бошқача таъсир қилади. У шунчаки “бахтли бўлинг” демаяпти — у кундалик ҳаётнинг қийматини кечроқ эмас, ҳозир англаш кераклигини эслатяпти.
Мессининг таъкидлашича, ҳозир у оддий, майда, лекин энг қимматли нарсаларни янада кўпроқ қадрлайди. Айниқса, оиласи билан ўтказиладиган вақт унинг учун аввалгидан ҳам муҳимроқ бўлиб қолган.
— Ҳозир кундалик ҳаётни, оддий майда нарсаларни, оилам билан ўтказган вақтни янада кўпроқ қадрлайман. Эртага нима бўлишини ҳеч қачон билмайсан, — дея қўшимча қилди у.
Қисқаси, Мессининг бу фикрлари футболдан ташқари ҳаётга ҳам тегишли. Кубоклар, рекордлар, шон-шараф — булар муҳим. Лекин охир-оқибат инсонга энг қаттиқ таяниб қоладиган нарса — яқинлар, оддий лаҳзалар ва шу куннинг ўзи экан.
Маълумот учун, 2 март куни “Интер Майами” МЛС доирасида “Орландо Сити”га қарши майдонга тушади. Аммо бу гал Мессининг энг кучли “ассисти” майдонда эмас, сўзларида бўлди: ҳаётдан завқ олишни унутманг.
“Zamin”ни Telegram'да ўқинг!
