Президент Шавкат Мирзиёев Наманган шаҳрида ўтказилаётган ва жаҳон миқёсида эътибор қозонган “Камбағалликдан фаровонлик сари” халқаро форумининг очилиш маросимида нутқ сўзлади. Ушбу нуфузли анжуманда 30 дан зиёд халқаро ташкилотлар ва 200 га яқин таниқли экспертлар иштирок этмоқда.
Давлат раҳбари таъкидлаганидек, бугунги кунда мамлакатда еттита устувор йўналишни қамраб олган “Камбағалликдан фаровонлик сари” дастури амалда йўлга қўйилган. Бу дастурнинг асосий моҳияти – кам таъминланган аҳолини шунчаки вақтинчалик ишга жойлаштириш эмас, балки улар учун доимий иш ўринлари яратиб, барқарор ва узлуксиз даромад манбаига эга қилишдир.
Президент сўзларига кўра, мамлакатда қулай ишбилармонлик муҳити яратилиб, охирги саккиз йил давомида 700 мингдан зиёд тадбиркор ўзининг барқарор фаолиятини йўлга қўйди. Бу эса фақатгина иқтисодий ўсиш эмас, балки ижтимоий масъулиятнинг ҳам намоёнидир.
“Қувонарлиси, давлат тадбиркорликка шарт-шароит яратиб бермоқда, тадбиркорлар эса ўз зиммаларига ижтимоий масъулият олиб, эҳтиёжманд қатлам вакилларини ишли ҳамда даромадли қилишда яқиндан кўмакчи бўлмоқда. Шу каби самарали ҳамкорлик туфайли жорий йилнинг ўзида 270 мингдан ортиқ камбағал оила вакиллари доимий иш билан таъминланди”, — деди Шавкат Мирзиёев.
Шунингдек, мамлакатда камбағалликни қисқартириш ва аҳоли даромадларини кўпайтириш йўналишида халқаро ташкилотлар ва йирик молия институтлари билан ҳамкорлик фаол давом этмоқда. Хусусан, Ислом тараққиёт банки билан ҳамкорликда амалга оширилаётган қишлоқларда турмуш шароитини яхшилаш, йўл ва инфратузилмалар қуриш, тиббиёт ва таълим хизматларини кенгайтиришга қаратилган умумий қиймати 5 миллиард долларлик лойиҳаларнинг аҳамияти алоҳида қайд этилди.
Бу каби дастурлар, экспертлар таъкидлаганидек, нафақат аҳолининг кундалик турмуш тарзини яхшилайди, балки келажакда бутун жамият тараққиётига мустаҳкам пойдевор бўлиб хизмат қилади.
«Замин»ни Telegram’да ўқинг!
