Ўзбекистонда 2025 йилнинг учинчи чорагида иш ҳақлари кескин пасайди. Head Hunter (hh.uz) платформаси маълумотларига кўра, иш берувчилар томонидан таклиф этилаётган ойлик маошлар ўтган йилнинг шу даврига нисбатан ўртача 20,2 фоизга камайган. Айрим соҳаларда эса бу рақам 70 фоиздан ҳам ошган.
Шу билан бирга, иш ўринларига бўлган таклифлар сони эса ортган — июльдан сентябргача hh.uz орқали 33 мингдан ортиқ фаол вакансия жойлаштирилган. Бу ўтган йилнинг шу даврига нисбатан 24 фоиз кўп.
Таклифлар кўпайди, лекин маошлар тушди
Ҳисобот даврида ишга таклифлар сонининг катта қисми Тошкент шаҳрига тўғри келган бўлса-да, пойтахтдаги фаол вакансиялар сони 81,9 фоизга камайган. Шу билан бирга, ҳудудларда эса аксинча, ўсиш қайд этилган: Жиззахда вакансиялар сони 1,5 баробарга кўпайган, Наманганда 49 фоиз, Фарғона, Андижон, Бухоро ва Самарқандда эса 40 фоиздан ортиқ ўсиш кузатилган.
Ҳудудий тақсимотга кўра, Самарқанд умумий бўш иш ўринларининг 4,8 фоизини ташкил этган. Қолган шаҳарларда эса бу кўрсаткич 1,6 фоиздан ошмаган.
Ўртача маош — 4,36 миллион сўм
Жорий йилнинг III чорагида Head Hunter орқали таклиф этилган ўртача ойлик маош 4,36 миллион сўмни ташкил этган. Бу кўрсаткич 2024 йилга нисбатан 20,2 фоизга паст. Пойтахтда иш ҳақлари ҳануз энг юқори бўлиб, ўртача 5,083 миллион сўмни ташкил этган. Бироқ Тошкентда ҳам иш ҳақи 41 фоизга камайган.
Айрим ҳудудларда пасайиш янада жиддий бўлган — Навоийда маош икки бараварга, Қаршида 92 фоизга, Чирчиқда эса 21,6 фоизга тушган. Шу билан бирга, Андижонда иш ҳақлари 25 фоизга, Самарқанд ва Фарғонада эса 2,7 фоизга ошган.
Таҳлилчиларнинг фикрича, бундай кескин ўзгаришлар меҳнат бозоридаги мавсумий омиллар, иш тузилмасидаги ўзгаришлар ва оммавий бўш иш ўринлари кўпайиши билан боғлиқ бўлиши мумкин.
Қайси соҳаларда маошлар юқори ва паст?
Ҳозирги вақтда энг юқори иш ҳақлари, одатдагидек, олий ва ўрта бошқарув соҳасида қайд этилган — ўртача 8,94 миллион сўм. Аммо бу ҳам ўтган йилга нисбатан 13,7 фоизга камайган. Иккинчи ўринда ҳуқуқшунослар турибди — уларнинг ўртача маоши 6,5 миллион сўмни ташкил этиб, 21 фоизга пасайган.
Топ-5 соҳалар қаторига автомобиль бизнеси (6,48 миллион сўм), қишлоқ хўжалиги (6,16 миллион сўм) ва инвестиция ҳамда консалтинг йўналишлари (5,44 миллион сўм) киради. Фақат қишлоқ хўжалигида иш ҳақлари барқарорлигини сақлаб қолган.
Энг паст маошлар хавфсизлик соҳасида аниқланган — 1,59 миллион сўм. Бу кўрсаткич ўтган йилга нисбатан деярли икки бараварга камайган. Суғурта соҳасида иш ҳақи 62 фоизга пасайиб, 2,36 миллион сўмни ташкил этган. Уй хизматчилари учун маош 2,4 миллион сўм (-32,3%), умумий овқатланиш соҳасида эса 2,65 миллион сўм бўлган. IT соҳасидаги ўртача иш ҳақи эса 4,35 миллион сўм атрофида.
Маъмурий ходимлар энг катта зарбани ҳис қилган: уларнинг иш ҳақи 72,6 фоизга тушиб, 3,13 миллион сўмгача камайган. Қурилиш соҳасида маошлар 62,5 фоизга, молия ва бухгалтерияда эса 47,7 фоизга пасайган.
Миллий статистика маълумотлари бошқача кўрсаткич кўрсатмоқда
Миллий статистика қўмитаси маълумотларига кўра, йилнинг биринчи ярим йиллигида Ўзбекистондаги ўртача номинал иш ҳақи 5,98 миллион сўмни ташкил этган. Бу кўрсаткич ўтган йилга нисбатан 17,2 фоизга юқори. Тошкент шаҳрида эса ўртача маош 10 миллион сўмдан ошган. Молия ва IT соҳалари ойлик миқдори бўйича етакчиликни сақлаб турибди.
Қайси соҳаларда талаб ортиб боряпти?
Head Hunter маълумотларига кўра, иш таклифларининг 15 фоизи сотув ва мижозларга хизмат кўрсатиш соҳасига тўғри келган. Маркетинг ва реклама йўналиши 11 фоизни, фитнес, спорт ва гўзаллик соҳалари эса 7,8 фоизни ташкил этган. Автомобиль бизнесига тегишли эълонлар улуши 6,7 фоиз бўлган.
Энг кам иш таклифлари суғурта (0,1 фоиз), хавфсизлик ва ҳуқуқшунослик (0,6 фоиз) соҳаларида қайд этилган. Шу билан бирга, қишлоқ хўжалиги ва қазиб олиш соҳаларига талаб анча паст бўлса-да, суғурта соҳасидаги бўш иш ўринлари сони 2,5 баробарга кўпайган.
HR мутахассислари, бухгалтерлар ва молиявий экспертларга бўлган талаб энг кўп ошган (+54,9 фоиз). Қазиб олиш соҳаси (+52,2%) ва чакана савдода (+41%) ҳам ўсиш қайд этилган.
“Zamin”ни Telegram'да ўқинг!
