15 октябрь куни Президент Шавкат Мирзиёев Саудия Арабистони Подшоҳлиги инвестициялар вазири Холид ал-Фалиҳни қабул қилди. У етакчи саудия компаниялари раҳбарларидан иборат нуфузли делегацияга бошчилик қилиб, Ўзбекистонга ташриф буюрди.
Учрашув аввалида Холид ал-Фалиҳ давлат раҳбарига Саудия Подшоҳи Салмон бин Абдулазиз Ол Сауд ва Валиаҳд, Бош вазир Муҳаммад бин Салмоннинг самимий саломи ва эзгу тилакларини етказди.
Суҳбат давомида икки давлат ўртасидаги кўп қиррали ҳамкорликни янада чуқурлаштириш, амалга оширилаётган олий даражадаги келишувларнинг ижросини таъминлаш ва янги йўналишларда шерикликни кенгайтириш масалалари муҳокама қилинди.
Президент Шавкат Мирзиёев сўнгги йилларда Ўзбекистон–Саудия муносабатлари мисли кўрилмаган даражада фаол ривожланаётганини таъкидлади. Барча соҳаларда ҳамкорлик янги босқичга кўтарилди: савдо айланмаси ўсмоқда, тўғридан-тўғри инвестициялар ҳажми кўпаймоқда, қўшма корхоналар сони ортмоқда. Шу билан бирга, икки давлат ўртасидаги авиақатновлар ҳам кенгайди.
Учрашувда қайд этилишича, жорий лойиҳалар портфели ҳозирда 27 миллиард доллардан ошиб кетган. Шундан 15 миллиард долларлик катта улуш “ACWA Power” компанияси билан энергетика соҳасида амалга оширилаётган йирик қувватларни барпо этиш лойиҳаларига тўғри келади.
Яқинда Тошкентда бўлиб ўтган Ҳукуматлараро комиссия ва Ишбилармонлар кенгашининг навбатдаги йиғилишлари самарали натижалар берди. Улар доирасида қатор янги битим ва шартномалар имзоланди, бу эса икки мамлакат бизнес алоқаларига янги туртки берди.
Учрашувда “яшил” энергетика, қишлоқ хўжалиги, электротехника, кўчмас мулк ва инфратузилма соҳаларидаги лойиҳаларни тез фурсатда амалга оширишга алоҳида эътибор қаратилди.
Президент Шавкат Мирзиёев Саудия билан муносабатларни фақат иқтисодий эмас, балки стратегик ҳамкорлик даражасига кўтариш зарурлигини таъкидлади. Саудия делегацияси вакиллари эса Ўзбекистоннинг очиқ ва барқарор инвестиция муҳити, ислоҳотлар суръати ва минтақавий аҳамияти юқори лойиҳаларга катта қизиқиш билдираётганини қайд этди.
Шундай қилиб, Тошкентдаги бу учрашув икки давлат ҳамкорлигида янги саҳифа очди — ўзаро ишонч ва манфаатли шериклик асосида миллиардлаб долларлик истиқболли лойиҳалар амалга ошиши кутилмоқда.
“Zamin”ни Telegram'да ўқинг!
