Асли сурхондарёлик Буюк Британия фуқароси Ўзбекистонга 5 миллион доллар инвестиция киритди

Асли келиб чиқиши сурхондарёлик, Буюк Британия фуқароси бўлган тадбиркор Акбар Ашуров Ўзбекистонга инвестиция киритмоқда.

Тадбиркор ЎзАга берган интервьюсида кластер услубида пилла етиштириш, уни қайта ишлаш ва тайёр маҳсулот ҳолда экспорт қилишга катта сармоя киритганини билдирди.

— Менинг Ватаним — Ўзбекистон. Ота юртимни севаман ва бундан албатта фахрланаман, — дейди Акбар Ашуров. — Президент Шавкат Мирзиёев чет элда бизнес қилиб юрган ватандошларни юртга қайтишга, олдинги муаммоларни унутиб, Ўзбекистонда турли корхоналар, завод ва фабрикалар қуришга чақиргани менда катта таассурот қолдирди. Ислоҳотлар бошлангани бизни албатта қувонтиради ва биз уларнинг давомли бўлишидан умидвормиз. Ўйлаб қолдим, нега ўз маблағимни юртим ривожи, унинг гуллаб-яшнаши учун йўналтирмаяпман. Мен буни қилишим керак. Шунда инвестиция киритиш учун қилган мурожаатим қўллаб-қувватланди. Тақдим этилган лойиҳалар орасида «Ўзбекипаксаноат» уюшмасининг ипакни қайта ишлаш корхонаси барпо этиш борасидаги таклифи менда қизиқиш уйғотди.

5 миллион долларга тенг лойиҳани амалга ошириш мақсадида Жиззах вилоятини танладим. Бизга 11,5 миллиард сўм инвестиция киритиш ва 120 иш ўрни яратиш шарти билан бир гектардан кўпроқ ер майдони нол қийматда ажратиб берилди.

Ҳозир қурилиш ишлари жадаллик билан бормоқда. Ипак етиштириш мавсуми бошлангунча, корхонамиз ишга тушади. Ипакни йигириш ускуналарини Хитойдан, мато ишлаб чиқариш жиҳозларини Европадан олиб келиш борасида шартнома тузганмиз.

Энг қизиғи, ҳали корхонамиз ишга тушмасидан бизга буюртмалар тушмоқда. Мисол учун, Эрон, Туркия, Покистон, Озарбайжон, Вьетнам каби қатор давлатлар ипак толасини харид қилиш истагини билдирмоқда. Корхона биринчи босқичда йилига 144 тонна қуруқ пиллани қайта ишлайди. Йил охирига бориб, 2 миллион долларлик маҳсулот экспорт қиламиз.

2019 йилда ипак матолар ва улардан кийим-кечаклар ишлаб чиқаришни бошлаймиз. Корхонанинг тўлиқ қувватда ишлаши 2022 йилга мўлжалланган. Унга қадар 480 доимий ва 10 мингта мавсумий иш ўрни яратилади.

Мақсадимиз пиллани қайта ишлашдан тортиб экспорт учун мато, кийим-кечак ва гилам ишлаб чиқариш жараёнигача бўлган барча босқичларни тўлиқ қамраб олишдан иборат.

Тизимда кластер ташкил этиш тажрибасини қўллаб-қувватлайман. Шу боис корхона қошида олтита инновацион қуртхона қурилади. Уларнинг атрофида 180 гектар тутзор яратиш, «смарт» технологиялар ва ноу-хауларга асосланган янгича ишлаб чиқариш услубини йўлга қўйиб, бир йилда уч марта ҳосил олинади. Ана шунда экспорт имкониятимиз янада ошади.

Ишонаманки, Ўзбекистон яқин йилларда дунёнинг ривожланган давлатлари қаторидан жой олади. Келгусида яна кўплаб лойиҳаларни молиялаштириш ниятидаман. “Замин” янгиликларини “Twitter”да кузатиб боринг