Тошкент туманида ота алимент ўрнига фарзандларига уй жой берди

Мажбурий ижро бюросининг Тошкент туман бўлими томонидан моддий ёрдамга муҳтож бўлган вояга етмаган ёки меҳнатга лаёқатсиз шахслар таъминоти учун алимент тўлаш мажбуриятини таъминлаш, ижтимоий ҳимояга муҳтож болаларни қўллаб-қувватлаш тизимини янада кучайтириш борасида кенг кўламли ишлар амалга ошириб келинмоқда.

Жумладан, Бюронинг Тошкент туман бўлими иш юритувидаги фуқаролик ишлари бўйича Зангиота туманлараро судининг 18.01.2019 йилдаги ижро варақасига асосан қарздор Н.Каримовдан ундирувчи З.Каримова фойдасига қарамоғидаги икки нафар фарзандларининг моддий таъминоти учун 1/3 қисм миқдорида алимент ундириш тўғрисидаги ижро ҳужжати мавжуд.

Мазкур ижро ҳужжати юзасидан олиб борилган ижро ҳаракатлари давомида қарздор Н.Каримов икки нафар фарзандлари 18 ёшга тўлгунига қадар бўлган алимент қарздорлиги эвазига Тошкент туманида жойлашган ўзига тегишли бўлган турар жойни натура кўринишида ундирувчига тақдим қилишини билдириб, томонларнинг ўзаро келишуви билан ушбу турар-жой қарздор томонидан қизи Ш.Каримованинг номига ўтказиб берилганлиги ва қарздорнинг фарзандлари вояга етгунига қадар бўлган алимент тўловлари тўлиқ бартараф этилганлиги юзасидан ундирувчидан тегишли тартибда тилхат олинган.