Наманганда бозордаги тадбиркордан пора талаб қилган солиқ ходими қўлга олинди

^{Фото: Наманган вилоят ИИБ матбуот хизмати}
Наманганда бозорда савдо билан шуғулланувчи тадбиркордан пора талаб қилган солиқ ходими қўлга олинди. Бу ҳақда вилоят ИИБ матбуот хизмати маълум қилди.

Қайд этилишича, жорий йил 24 июнь куни Наманган шаҳрининг Янги Наманган туманида яшовчи фуқаро вилоят Ички ишлар бошқармаси бошлиғига ариза билан мурожаат қилган. Шаҳарнинг «Сардоба» бозорида хўжалик моллари савдоси билан шуғулланувчи тадбиркор ўз аризасида Наманган шаҳар давлат солиқ инспекциясидан бозорга бириктирилган инспектор ҳар ой солиқ тўловларини тўламасдан фаолият юритиш эвазига 500 минг сўм талаб қилаётганлигини билдириб, қонуний чора кўришни сўраган.

Аризага асосан вилоят ИИБ Коррупция ва иқтисодий жиноятларга қарши курашиш бўлими томонидан ДХХ ва вилоят прокуратураси билан ҳамкорликда тезкор тадбир ўтказилди. Тадбирда солиқ инспектори аризачидан кимёвий ишлов берилган 500 000 сўмни пора тариқасида олган вақтда ушланиб, далилий ашёлар олинган.

^{Фото: Наманган вилоят ИИБ матбуот хизмати}
«Мазкур ҳолат юзасидан вилоят прокуратураси томонидан Жиноят кодексининг 210-моддаси иккинчи қисми билан жиноят иши қўзғатилиб, гумонланувчи процессуал тартибда ушланган», дейилади матбуот хизмати хабарида. “Замин” янгиликларини “Youtube”да кузатиб боринг