Юлдуз Ражабова нимадан қийналгани ва кучли оғриқни ҳис қилгани ҳақида гапирди (фото, видео)

^{Фото: Instagram}
Актриса Юлдуз Ражабова бошловчи журналист Турсуной Алимовага берган интервьюсида қалб кечинмалари билан ўртоқлашди.

— Сўнгги уч-тўрт йил ичида, мен эмас, балки ижтимоий тармоқларда ҳаётим ҳақида кўпроқ биладиган инсонлар бордек туюлди. У пайтда жуда оғир аҳволда эдим. Шу нарсани тушуниб етдимки, агар қиз бола туғилганиданоқ отаси ёки акаси унга севги қандай бўлиши кераклигини кўрсатмаса ёки меҳр бермаса, аёл севги қандай бўлишини билмайди.

^{Фото: Instagram}
— Меҳр кўрмаган қиз эртами-кечми келин бўлганида, эҳтимол турмуш ўртоғи унга қўл кўтарса, буни нормал ҳолат деб ўйлайди. Аёл кишининг ҳаёти болаликдаги меҳрга қанчалик боғлиқ эканини тушуняпсизми? Ҳозир мени хафа қилган нарсалар билан яна бир бор юзлашяпман ва такрор оғриқларни ҳис қиляпман. Мени “Нимага ўшанда ўзимни ҳимоя қила олмадим?” деган савол қийнамоқда.

Юлдуз Ражабова қандай хатолар кечирилмаслиги ҳақида гапирди.

^{Фото: Instagram}
— Назаримда кечирилмайдиган хатолардан бири — бир инсоннинг ҳаётини, турмуш тарзини, тарбиясини ёки фикрларини ўзига мос қилиб ўзгартириш ҳаракатидир, деб ўйлайман. Мисол учун, сизнинг бошингиздан ўтган нарсани мен ҳис қилолмайман. Мен фақат эшитишим ва уни сал бўлса ҳам ҳис қилиб кўришга ҳаракат қилишим мумкин. Лекин мен агар ўз хоҳишим билан сизни ўзгартирмоқчи бўлсам, бу бир инсоннинг ҳаётига рухсатсиз кириш бўлади.
Тасаввур қилинг, сиз бир инсон учун ўзлигингиздан воз кечяпсиз. Агар ўша инсонга керак бўлмай қолсангиз нима бўлади?

^{Фото: Instagram}
— Мен инсонларнинг кўнглини олиш учун ўзимни йўқотиб қўйганимни ҳис қилдим. Бу менга ҳаловат бермади. Улар билан жисмонан яқин эдим, бироқ қалблар орасидаги масофа машриқ билан мағриб оралиғигача эди, дейди Юлдуз Ражабова.
“Замин” янгиликларини “Telegram”да кузатиб боринг