Ўзбекистонда Россия томонида Украина урушида қатнашган ёлланма жангчига нисбатан суд ҳукми чиқарилди. У аввал Россияда гиёҳвандлик иши бўйича 10 йилга қамалган, кейин эса колонияда урушга жалб қилинган.
Суд ҳужжатларига кўра, 25 ёшли М.К. 2021 йилда иш излаб Россияга йўл олган. 2022 йил февралда қариндоши унга енгил иш ва юқори маош таклиф қилган. Шу боис улар Москвадан Тулага йўл олишган.
Йўлда полиция ҳужжат ва шахсий тинтув ўтказган. Қариндошидан героин топилган. М.К.нинг айтишича, ундан ҳеч нарса чиқмаган бўлса-да, уни ҳам айбдор деб топишган ва 10 йилга озодликдан маҳрум этишган.
Колонияда унга мунтазам равишда урушда қатнашиш таклиф қилинган. 1,8 миллион рубль ва Россия фуқаролиги ваъда қилинган. 2024 йил октябрда у Россия Мудофаа вазирлиги билан шартнома имзолаган.
2025 йил январда Донецк вилоятидаги Торецьк шаҳри яқинида граната парчасидан жароҳат олган. Донецк госпиталига олиб борилган.
Бир неча кундан кейин бошқа шифохонага олиб кетилаётганда қочган. Москвага етиб, Ўзбекистон элчихонасига мурожаат қилган.
Ватанига қайтгач, М.К. ихтиёрий равишда ички ишлар органларига бориб, урушда қатнашганини айтган.
Каттақўрғон туман суди уни Ўзбекистон ЖК 154-моддаси 1-қисми билан айбдор деб топиб, 4 йил озодликни чеклаш жазосини тайинлади.
«Замин»ни Telegram’да ўқинг!
