Ижтимоий тармоқларда тарқалган видеолар Навоий шаҳрида катта тортишувларга сабаб бўлди. Уларда Олимпиада чемпиони деб тахмин қилинган шахснинг ресторан ходимини уриб, тан жароҳати етказгани акс этгани ҳақида хабарлар тарқалди. Воқеа кенг муҳокамаларга сабаб бўлгач, вилоят ИИБ расмий изоҳ берди.
Маълум бўлишича, воқеа жорий йилнинг 22 август куни тонгги соат 2:00 ларда Навоий шаҳридаги “Зиёкор” маҳалласи ҳудудида юз берган. Кармана туманида яшовчи 1994 йилда туғилган С.А. танишлари билан ресторанга кириб, овқатланиб чиққан. Ҳисоб-китоб вақтида у тўловни амалга оширган, аммо етишмаган қисмни олиб келиш учун машинасига чиққан.
Айнан шу пайтда ресторанда ишловчи 2004 йилда туғилган М.У. С.А. олдига бориб, қолган пулини ҳам тўлашни сўраган. Аммо спиртли ичимлик таъсирида бўлган С.А. у билан оғзаки тортишиб, жамоатчиликдаги одоб-ахлоқ қоидаларини инкор этган ҳолда, М.У.га қўли билан юзига урган ва унга тан жароҳати етказган.
Тергов давомида аниқланишича, у видеоларда айтилаётганидек Олимпиада чемпиони эмас. У ўша куни ресторанга 1995 йилда туғилган икки карра паралимпиада чемпиони, диск улоқтириш бўйича машҳур спортчи Э.С. билан келган. Можаро вақтида Э.С. машина салонида бўлган ва кейинчалик вазиятга аралашиб, С.А.ни тинчлантиришга уриниш билан бирга, жабрланувчига ёрдам кўрсатган.
Расмий маълумотга кўра, мазкур ҳолат юзасидан Ўзбекистон Республикаси Жиноят кодексининг 277-моддаси 1-қисми бўйича жиноят иши қўзғатилган. С.А.га нисбатан қонуний тартибда гумонланувчи сифатида чора қўлланилган. Ҳозирда тергов ҳаракатлари олиб борилмоқда ва воқеанинг барча жиҳатлари ўрганилмоқда.
«Замин»ни Telegram’да ўқинг!
