Ўзбекистонда сурункали алкоголизмни даволашга қаратилган янги ихтиро давлат рўйхатидан ўтказилди. «Сурункали алкоголизмни даволовчи восита» номи билан танилган ушбу препарат IAP 8081-сонли патент билан қонуний муҳофазага олинди. Бу ҳақда Адлия вазирлиги матбуот хизмати маълум қилди.
Маълумотларга кўра, алкоголизм — бу спиртли ичимликларга кучли патологик иштиёқ ва руҳий ҳамда жисмоний қарамликка олиб келадиган сурункали касаллик. У жамиятда катта ижтимоий ва тиббий муаммо сифатида намоён бўлиб келмоқда. Янги ихтиро эса ушбу оғир касалликка қарши курашишда муҳим қадам сифатида баҳоланмоқда.
Таъкидланишича, яратилган воситанинг асосий мақсади алкоголизмнинг I ва II босқичларини самарали даволаш ҳамда касалликнинг қайтадан кучайиб кетишининг олдини олишдан иборат. Бу эса беморларнинг ҳаёт сифатига ижобий таъсир кўрсатиб, уларнинг жамиятга соғлом қайтишига ёрдам бериши кутилмоқда.
«Замин»ни Telegram’да ўқинг!
