Самарқанд вилоятида ноқонуний электр энергиясидан фойдаланиш билан боғлиқ йирик ҳолат фош этилди. «Ўзэнергоинспекция»нинг вилоят ҳудудий бошқармаси ҳамда прокуратура органлари ҳамкорлигида ўтказилган назорат тадбирлари давомида “Sh.A.” номли оилавий корхона қонунбузарликка қўл ургани аниқланган.
Текширув жараёнида маълум бўлишича, мазкур корхона мутасаддилари электр тармоқларига ўзбошимчалик билан уланиб, узоқ вақт давомида тўловсиз ҳолда электр энергиясидан фойдаланиб келган. Дастлабки ҳисоб-китобларга кўра, электр таъминоти корхонасига етказилган моддий зарарнинг умумий ҳажми 2 миллиард 160 миллион сўмни ташкил этган. Бу эса ўта катта кўрсаткич ҳисобланади.
Мутасаддиларнинг таъкидлашича, электр энергияси давлат мулки ҳисобланади ва ундан ноқонуний фойдаланиш нафақат иқтисодий зарар келтиради, балки бутун тизимнинг барқарор ишлашига ҳам салбий таъсир кўрсатади. Чунки бундай ҳолатларда бошқа истеъмолчилар учун ҳам тўсатдан узилишлар ва носозликлар юзага келиши мумкин.
Ҳозирда ушбу қонунбузарлик бўйича тегишли ҳужжатлар расмийлаштирилмоқда. Ҳуқуқни муҳофаза қилувчи органлар терговга қадар текширув ишларини бошлади. Айбдор шахсларга нисбатан қонунчиликка мувофиқ чоралар кўрилиши кутилмоқда.
«Замин»ни Telegram’да ўқинг!
