Самарқанд вилоятининг Каттақўрғон туманида аёлини тириклай чуқурга кўмган эркакка суд ҳукми ўқилди. “Дарё” манбаси томонидан ўрганилган суд ҳужжатларида кўрсатилишича, жиноятни 1995 йилда туғилган А.Н. содир этган.
У 2019 йилда Э.Э. билан расмий никоҳдан ўтган ва уч нафар фарзандли бўлишган. Оилада доимий жанжал ва зўравонлик кузатилган. 2021 йил апрель ойида, эр уйга маст ҳолда келган ва аёлини калтаклаб, уни чуқур қазишга мажбурлаган. Қазилган чуқурга аёлни тушириб, устидан тупроқ ташлаб, ҳатто “Жигули” автомобилини ҳам қўйган.
Уч кун овқатсиз ва сувсиз ётган аёл ҳушини йўқотган. Ўзига келганида эса яна таҳдид, зўрлик ва мажбурлаш давом этган. Суд ҳужжатларига кўра, эр аёлни итни ўлдириш орқали қўрқитган ва яна ўша чуқурни кўмишни буюрган.
Аёл орадан йиллар ўтибгина — 2025-йил 2-феврал куни навбатдаги жанжал ортидан ички ишлар бўлимига мурожаат қилган. Суд жараёнида у турмуш ўртоғига моддий даъвоси йўқлигини билдирган, бироқ суд жиноят оғирлигини инобатга олган.
Натижада, А.Н. Жиноят кодексининг бир нечта моддалари бўйича айбдор деб топилиб, 3 йил 3 ойга озодликдан маҳрум қилинди. У жазони қаттиқ тартибли колонияда ўтайди.
