Тошкент вилоятининг Оҳангарон туманида ички ишлар ходимларига ҳужум қилган икки йигитга нисбатан суд ҳукми чиқарилди. Бу ҳақда суд манбалари маълум қилди.
Маълумотларга кўра, воқеа 1 августдан 2 августга ўтар кечаси рўй берган. Икки нафар йигит Самарқанд шаҳридан Наманган томонга йўловчи сифатида йўлга чиққан. Улар ҳайдовчи Сирдарё вилояти ҳудудида ёқилғи қуйиш шохобчасига тўхтаган пайтда унинг автомашинасини олиб қочишган.
Ҳодисадан сўнг Бўка тумани ички ишлар бўлими жиноят қидирув бўлими тезкор вакили, майор Нурибек Шодиев уларни тўхтатиб, ички ишлар бўлимига олиб кетмоқчи бўлган. Бироқ айбдорлардан бири ходимга пичоқ билан зарба бериб, хизмат автомашинасини ҳам олиб қочган.
Шундан сўнг улар Оҳангарон тумани бўйлаб ҳаракатланишда давом этган ва Йўл-патрул хизмати инспектори уларни тўхтатишга уринган. Аммо йигитлар инспекторнинг қонуний талабларига бўйсунмасдан, машинани ходим устига ҳайдаб оғир жароҳат етказган.
Бўка туман суди уларни айбдор деб топди: суд қароригa кўра, улардан бири 9 йил 6 ой муддатга озодликдан маҳрум этилди, иккинчиси эса 15 йил 6 ойга қамалди.
Эслатиб ўтамиз, сўнгги ҳафталарда ЙПХ ходимларига нисбатан ҳужум ҳолатлари бир неча ҳудудларда кузатилди. Хусусан, 2 ноябрь куни Фарғона йўли кўчасида ҳайдовчи инспекторни капотда судраб кетгани ҳақида хабар қилинган, Самарқанд ва Фарғона шаҳарларида ҳам шунга ўхшаш ҳолатлар аниқланган.
Маҳаллий ҳуқуқ-тартибот органлари ҳайдовчилардан қонун талабларига қатъий риоя этишни, полиция ходимларига қарши ҳаракатлар оғир жиноий жавобгарликка олиб келишини эслатмоқда.
“Zamin”ни Telegram'да ўқинг!
