Тошкент вилоятида беморлар номидан сохта аккаунтлар очиб, эҳсон пулларини ўзлаштириб келган фуқаро фош этилди. Қонунбузарлик Жиззах вилояти ИИБ ходимлари томонидан аниқланиб, гумонланувчи қўлга олинди.
Маълум бўлишича, Тошкент вилояти Бўка туманида яшовчи, 1999 йилда туғилган Д.Р. 2025 йил сентябрь ойидан бошлаб Telegram мессенжери орқали бир нечта сохта аккаунтлар очган. У турли ижтимоий гуруҳларда аввал оғир касалликка чалиниб, гўёки соғайиб кетган шахслар номидан тарқатилган расм ва видеоларга ўзининг банк пластик карта рақамларини илова қилган.
Шу йўл билан у одамларнинг ишончидан фойдаланиб, эҳсон сифатида юборилган маблағларни тўплаб, уларни шахсий эҳтиёжларига сарфлаб юборган. Ушбу фирибгарлик ҳолати Жиззах шаҳридаги “Заргарлик” маҳалласида яшовчи фуқаронинг ҳуқуқни муҳофаза қилувчи органларга қилган мурожаати орқали очиқланган.
Ҳозирда мазкур ҳолат юзасидан Жиноят кодексининг тегишли моддалари асосида жиноят иши қўзғатилиб, дастлабки тергов ҳаракатлари олиб борилмоқда.
Айни шу каби ҳолатлар мамлакатнинг бошқа ҳудудларида ҳам кузатилган. Жумладан, Бухоро вилоятида Telegram орқали нуфузли ташкилот раҳбари номидан сохта аккаунт очиб, корхона ва муассаса раҳбарларига “хизмат топшириғи” мазмунида хабарлар юборган шахс аниқланган. Ҳатто ташкилот раҳбарларидан бири фирибгарга ишониб, унинг картасига 8 миллион сўм пул ўтказиб берган.
Шунингдек, айрим ҳолатларда хорижда вафот этган ўзбекистонликларни ватанга қайтариш баҳонасида пул йиғилаётгани ҳақида ҳам фуқаролар огоҳлантирилган. Маълумки, Ўзбекистон фуқароси чет элда вафот этган тақдирда, унинг жасади тегишли жамғармалар маблағлари ҳисобидан юртга олиб келинади.
Мутахассислар фуқароларни бундай ҳолатларда ҳушёр бўлишга, шубҳали хабар ва эҳсон сўровларига ишонмасликка чақирмоқда. Ҳушёрлик — фирибгарликка қарши энг кучли қалқондир.
