Ҳуқуқни муҳофаза қилувчи органлар минглаб одамларга жиддий зарар етказиши мумкин бўлган катта миқдордаги синтетик гиёҳвандлик воситаларини тарқатиш уринишининг олдини олди. Ноқонуний айланмадан жами 3 килограмм тақиқланган модда олиб қўйилди, бу қарийб 67 минг дона бир марталик дозага тенг. Бу ҳақда podrobno.uz хабар беради.
Операция ИИББ ва ДХХ ҳамкорлигида ўтказилган махсус тадбирлар натижасида амалга оширилди. Гумонланувчи пойтахтнинг Бектемир туманида 2,2 килограмм қадоқланган “синтетика” билан ушланган.
Кейинги текширувларда Жиззах вилоятида, ушланган шахснинг уйидан яна 800 грамм синтетик модда топилди. Таъкидланишича, гиёҳвандлик воситаси ерга кўмилган ҳолда яширилган.
Сўроқ чоғида гумонланувчи қилган ишининг оғир оқибатларини тушунганини, бироқ “осон пул” илинжида ва оилавий муаммолар сабаб жиноятга қўл урганини айтган. Суд унга нисбатан қамоққа олиш эҳтиёт чораси қўллади. Ҳолат юзасидан Жиноят кодексининг 273-моддаси билан жиноят иши қўзғатилган бўлиб, мазкур модда 20 йилгача озодликдан маҳрум этишни назарда тутади.
“Zamin”ни Telegram'да ўқинг!
