Жиззах вилояти Пахтакор туманида яшаган оила турмушдаги келишмовчиликлар сабаб ажрашиб кетган. Шу ортидан аёл ота уйига қизларисиз қайтишга мажбур бўлгани айтилмоқда. Она эса фарзандларини соғиниб, уларни олиб кетиш умидида бир неча бор собиқ турмуш ўртоғининг уйига борган, лекин ҳар сафар эшик олдидан қайтарилган, ҳатто қизчаларни кўришга ҳам рухсат берилмаган.
Бу ҳолатга чидай олмаган она судга мурожаат қилган. Суд қарори билан болаларни она тарбиясига топшириш ҳақида ижро ҳужжати чиқарилиб, иш МИБнинг туман бўлими иш юритувига келиб тушган. Ижро ҳаракатлари жараёнида эса қизчалар атайлаб яширилгани маълум бўлгани учун расмий қидирув эълон қилинган.
Тезкор тадбирлар натижасида қизчалар Тошкент шаҳрида, амакисининг уйида экани аниқланган. Қизалоқлар олиб келиниб, онаси бағрига қайтарилган. Бу воқеа яна бир нарсани эслатади: болаларни “бахс предмети”га айлантириш осон, лекин уларнинг руҳиятини тиклаш энг қийин — шунинг учун бундай вазиятларда қонун ҳам, виждон ҳам биринчи ўринда туриши керак.
“Zamin”ни Telegram'да ўқинг!
