Самарқанд вилояти ИИБ “Сирожиддин медиа” МЧЖ раҳбари, YouTube платформасида фаол блогер сифатида танилган Сирожиддин Адилов қўлга олингани ҳақида маълум қилди.
ИИБ ахборотига кўра, Пастдарғом туманида яшовчи, 1961 йилда туғилган фуқаро Р.Х. 2024 йилнинг август ойларида Тошкент шаҳрида истиқомат қилувчи 1980 йилда туғилган С.А.га (Сирожиддин Адилов) мурожаат қилган. Мурожаат мазмуни — бошқа бир шахс билан ўртадаги молиявий масалани “ҳал қилиб бериш” бўлгани айтилмоқда.
Маълум қилинишича, С.А. ваколатли шахс бўлмаган ҳолда, ишни жабрланувчи фойдасига ҳал қилиб бериш эвазига маълум миқдорда пул олган, бироқ ваъда қилинган иш амалга ошмаган. ИИБ баёнотида, фуқаро С.А. ваъдасини бажармасдан, узоқ вақт давомида алдаб келгани ҳақида ҳам қайд этилган.
Шундан сўнг Пастдарғом туманида яшовчи фуқаро мазкур ҳолат юзасидан қонуний чора кўришни сўраб туман ИИБга ариза билан мурожаат қилган.
Ҳозирда ушбу ҳолат бўйича Сирожиддин Адиловга нисбатан Жиноят кодексининг 168-моддаси 2-қисми (фирибгарлик) ҳамда 211-моддаси (пора бериш) билан жиноят иши қўзғатилгани, унга нисбатан “қамоққа олиш” тарзидаги эҳтиёт чораси қўлланилгани маълум қилинди. Вилоят ИИБ ҳузуридаги Тергов бошқармаси томонидан тергов ҳаракатлари олиб борилаётгани таъкидланди.
Маълумот ўрнида: бу хабар ҳозирча ҳуқуқни муҳофаза қилувчи идоралар берган дастлабки маълумотлардан иборат. Якуний хулоса ва қарор тергов ҳамда суд жараёнлари натижасига кўра чиқарилади.
“Zamin”ни Telegram'да ўқинг!
