Тошкентда бир оилада бирданига 4 эгизак дунёга келди

Тошкент вилоятининг Тошкент туманида истиқомат қилувчи Одилжон ва Севара Абдуллаевлар оиласида қувончли воқеа юз берди — улар бир йўла 4 эгизак фарзандли бўлди. Оила бундан аввал 2 ёшли қизалоғини тарбиялаб келаётган эди. Эндиликда эса улар жами 5 нафар фарзанднинг ота-онасига айланди.

Чақалоқлар Республика перинатал марказида муддатидан олдин, кесарча кесиш амалиёти орқали дунёга келган. Шифокорлар томонидан жараён муваффақиятли ўтказилгани маълум қилинди.

Янги туғилган чақалоқларнинг биринчиси ўғил бола бўлиб, унинг вазни 1412 грамм, бўйи 37 сантиметрни ташкил этди. Иккинчи фарзанд эса қизалоқ бўлиб, 1624 грамм вазн ва 37 сантиметр бўй билан туғилган.

Учинчи эгизак ҳам қиз бола бўлиб, унинг вазни 1466 грамм, бўйи 37 сантиметрни ташкил қилган. Тўртинчи чақалоқ эса ўғил бўлиб, 1780 грамм вазн ва 38 сантиметр бўй билан дунёга келган.

Ҳозирги вақтда барча чақалоқлар тиббиёт муассасасида шифокорлар назорати остида, халқаро тиббий протоколлар асосида парвариш қилинмоқда.

Nigina Zarqarayeva

«ZAMIN.UZ» муҳаррири

+ Zamin.uz сайтини Googleга қўшинг