Самарқандда 2 гектар ер учун 490 минг доллар талаб қилинган ҳолат фош этилди
Самарқанд шаҳрида 2 гектар ер майдонини 490 минг АҚШ долларига ноқонуний сотмоқчи бўлган шахслар қўлга олинди. Гумонланувчилар ерни мансабдор танишлари орқали расмийлаштириб бериш эвазига 50 минг доллар бўнак олаётган вақтида ашёвий далиллар билан ушланган. Мазкур ҳолат юзасидан икки нафар фуқарога нисбатан жиноят иши қўзғатилиб, ҳозирда тергов ҳаракатлари олиб борилмоқда. Мутахассислар ер участкаларини сотиб олиш фақат «E-AUKSION» платформаси орқали қонуний амалга оширилишини эслатиб ўтмоқда.
Самарқанд шаҳрида ер майдонини ноқонуний тарзда сотишга уриниш билан боғлиқ ҳолат фош этилди.
Маълумотларга кўра, 1993 йилда туғилган шахс бошқа бир фуқаро билан келишган ҳолда 2 гектар ер майдонини харидорга 490 минг АҚШ долларига сотишни ваъда қилган.
Улар ушбу ер майдонини мансабдор танишлари орқали расмийлаштириб беришини айтган ҳолда, олдиндан 50 минг доллар талаб қилган.
Давлат хавфсизлик хизмати, Ички ишлар ва бошқа идоралар ҳамкорлигида ўтказилган тезкор тадбир давомида гумонланувчи 50 минг доллар пулни олаётган вақтда ашёвий далиллар билан қўлга олинган.
Ҳозирда ушбу ҳолат юзасидан икки нафар шахсга нисбатан жиноят иши қўзғатилиб, тергов ҳаракатлари олиб борилмоқда.
Мутахассислар ер участкаларини сотиш ва ажратиш фақат “E-AUKSION” электрон платформаси орқали қонуний тарзда амалга оширилишини эслатмоқда.
Изоҳлар 0
…