Қўқон ва Бекободда ноқонуний тамаки ва алкогол савдоси фош этилди
Қўқон ва Бекобод шаҳарларида ўтказилган тезкор тадбирларда тамаки ва алкогол маҳсулотларининг ноқонуний савдосига чек қўйилди. Қўқонда тадбиркордан 288,2 миллион сўмлик акциз маркасиз тамаки ва электрон сигареталар мусодара қилинган бўлса, Бекободда қалбаки акциз маркали ичимликлар сотилаётгани аниқланди. Барча ноқонуний маҳсулотлар ашёвий далил сифатида олиб қўйилди. Ҳозирда мазкур ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
Қўқон ва Бекобод шаҳарларида ўтказилган тезкор тадбирлар давомида тамаки ва алкогол маҳсулотларининг ноқонуний савдоси ҳолатлари аниқланди.
Бош прокуратура ҳузуридаги Департамент маълумотига кўра, Қўқонда тадбиркор ўз дўконида акциз маркасисиз тамаки маҳсулотларини ҳамда хорижда ишлаб чиқарилган электрон сигареталарни сотувга қўйгани фош этилган.
Текширув натижасида умумий қиймати 288,2 миллион сўм бўлган 14 мингдан ортиқ қутти тамаки маҳсулотлари аниқланиб, мусодара қилинган.
Бекобод шаҳрида эса МЧЖ раҳбари савдо нуқтасида қалбаки акциз маркали алкогол маҳсулотлари ва ҳужжатларсиз тамаки маҳсулотларини сотгани маълум бўлган.
Бу ерда 619 дона алкогол маҳсулоти ҳамда 1 200 дан зиёд қутти тамаки маҳсулоти ноқонуний равишда савдога чиқарилгани қайд этилган.
Ҳар икки ҳолат бўйича маҳсулотлар ашёвий далил сифатида олиб қўйилган ва тегишли моддалар асосида жиноят ишлари қўзғатилиб, тергов жараёнлари олиб борилмоқда.
Изоҳлар 0
…