Фото: Видеодан кадр
Навоий вилоятининг Нурота туманида оғир йўл-транспорт ҳодисаси содир бўлиб, у фожиавий оқибатларга олиб келди. Дастлабки маълумотларга кўра, оилавий боғча раҳбари бўлган аёл 13 нафар болани Матиз русумли автомашинада боғчага олиб кетаётган вақтда автоҳалокатга учраган.
Ҳодиса оқибатида транспорт воситасини бошқариб келган аёл воқеа жойида ҳалок бўлган. Машинада бўлган болалардан бири оғир аҳволда — кома ҳолатига тушган, яна 8 нафари эса турли даражадаги жароҳатлар билан вилоят марказидаги шифохонага етказилган. Қолган болаларнинг ҳолати бўйича қўшимча маълумотлар аниқлаштирилмоқда.
Маълум қилинишича, ушбу аёл ҳамда унинг турмуш ўртоғи узоқ йиллар давомида ҳайдовчилик гувоҳномасисиз автомобил бошқариб келган. Бу ҳолат эса воқеа юзасидан жиддий саволларни келтириб чиқармоқда.
Мутасадди органлар томонидан ҳодиса сабаблари ўрганилмоқда. Дастлабки тахминларга кўра, йўл ҳаракати қоидаларига риоя қилинмагани ва хавфсизлик чораларининг етарли даражада таъминланмагани фожианинг асосий омилларидан бири бўлиши мумкин.
