Супермодель Кендалл Женнер 23 миллион доллар эвазига олти гектардан ортиқ ҳудудни ўз ичига олган қимматбаҳо қасрни харид қилди. Peopletalk’нинг ёзишича, янги қароргоҳ Калифорниянинг энг ёпиқ ва нуфузли ҳудудларидан бири — Санта-Барбара яқинида жойлашган бўлиб, у ерда Кендалл том маънода Опра Уинфрига қўшни бўлади.
Мажмуа бир нечта бинолардан иборат бўлиб, асосий уйнинг майдони 1400 квадрат метрдан ошиб кетади. Арxитектураси классик испан услубида қурилган бу уйнинг тарихи XIX асрга бориб тақалади. Ҳатто эҳтиёткорлик билан қайта тикланган қадимий иншоотлар ҳам ҳануз сақланиб қолган.
Ҳудудда зайтун боғлари, парваришланган атиргулзорлар, кенг майдонли газонлар ва бассейн мавжуд. Аммо мулкнинг энг асосий жиҳати — катта отхоналар ва очиқ майдонга эга профессионал от спорти майдони ҳисобланади. Маълумки, Кендалл болалигидан от минарди ва ижтимоий тармоқларда ҳам тез-тез отлар билан суратга тушиб туради.
Қасрнинг айвонларидан Тинч океани ҳамда Санта-Инес тоғлари манзараси кўзга ташланади. Қўшимча хавфсизлик учун мулк қўшни Опраникидан ажратиб турувчи тош девор билан ҳам муҳофаза қилинган. Шунинг учун ҳам қароргоҳ шахсийлик жиҳатидан максимал даражада таъминланган — Монтецито марказига боришга бир неча дақиқа кетса-да, уй бегона кўзлардан бутунлай яширин.
Қизиғи шундаки, мазкур тарихий қасрнинг илгари машҳур эгалари ҳам бўлган — улар орасида Эллен ДеЖенерес, Bumble асосчиси Уитни Вулф Херд ва Tinder яратувчиси Шон Рад ҳам бор. Энди эса Кендалл Женнер бу ноёб қароргоҳнинг янги эгасига айланди.
