Селена Гомес тўй арафасидаги сирли кечаси тафсилотларини ошкор қилди. Хонанда Бенни Бланко билан никоҳ тантанаси олдидан Кобо шаҳрида ўтказилган бакалавр зиёфатидаги лаҳзаларини ижтимоий тармоқда намойиш этди, деб ёзмоқда Peopletalk.
Машҳур ижрочи дўстлари билан бирга Мексиканинг Кобо-Сан-Лукас шаҳрида тўй олди байрамига борди. У келинлик мавзусидаги либосда бир қатор суратларини эълон қилди. Жумладан, “бўлажак келин” ёзуви туширилган фота, оқ мини сарафан, оқ бикини ва трикотаж кўйлакдаги кўзгу селфилари шулар жумласидандир.
Гомес ўз ёзувида байрам учун тайёрланган безаклар ҳақида ҳам сўзлади: каровати устига илинган “Левин хоним” ва “Келин” деб ёзилган шарлар диққатга сазовор бўлди. Шунингдек, у видеокарусель орқали саёҳатнинг муҳим воқеаларини намойиш қилди. Роликда маҳаллий мусиқачилар Селена ва унинг меҳмонларига серенада ижро этгани, шам ёруғида пляжда кечки овқат қилингани, сўнг эса қум устида “Тўй ҳалокатлари” фильмини томоша қилиш саҳналари акс этган.
Эслатиб ўтамиз, Селена Гомес ва Бенни Бланко ўртасидаги муносабатлар 2023 йил охирида ошкор бўлган эди. Хонанданинг ўзи биринчи бўлиб ишқини тан олгани ҳам маълум. 2024 йил январда жуфтлик оммавий тадбирларда бирга кўриниш берди. Шу билан бирга, Бенни Селенанинг собиқ йўлдоши Жастин Бибернинг яқин дўсти ҳам ҳисобланади. 2024 йил 12 декабрда эса актриса ўз обуначиларига турмуш қуриш ҳақидаги қувончли хабарни етказган эди.
